Dağlıq Şirvan bölgəsində 2024-2025-ci tədris ilində tam orta təhsil səviyyəsi üzrə keçirilən buraxılış imtahanının nəticələrinə görə İsmayıllı rayonu xüsusilə fərqlənib.

İsmayıllının müxtəlif məktəblərində təhsil alan onlarla şagird 200 baldan yuxarı nəticə göstərərək rayon təhsilindəki keyfiyyətin yüksəlişini nümayiş etdiriblər.

İ.Həsənov adına 1 nömrəli tam orta məktəb: uğurlar davam edir

İsmayıllı şəhəri İ.Həsənov adına 1 nömrəli tam orta məktəb regionda ən yüksək nəticələri olan təhsil müəssisəsi olub. Bu məktəbin məzun olmağa hazırlaşan 27 şagirdi buraxılış imtahanında 200-dən çox bal toplayıb. Məktəbin 20 nəfərlik texniki təmayüllü XI sinfinin 14 şagirdinin imtahan nəticəsi 200-dən yüksək olub. Sinfin ən yüksək nəticəsi Fidan Aslanlı adlı şagirdə məxsusdur – 292 bal. Məktəbin ən yüksək nəticəsi isə XI sinif şagirdi Sona Cəbiyevaya aiddir – 295.6 bal.

5 nömrəli tam orta məktəb: nümunəvi nəticələr

Regionun təhsil uğurlarına daha bir töhfəni isə İsmayıllı şəhəri 5 nömrəli tam orta məktəb verib. Məktəbin 25 şagirdi buraxılış imtahanında 200 baldan yüksək nəticə göstərib. Burada xüsusilə XI “b” sinfi fərqlənib – bu sinifin də 14 şagirdi yüksək nəticə göstərib.

Natiq Behdiyev adına 6 nömrəli tam orta məktəb: 24 yüksək nəticə

Məktəbdə ümumilikdə 24 şagird 200-dən çox bal toplayıb. Ən yüksək nəticəni Osman Həsənli göstərib – 297.5 bal. Onu Aysu Məmmədli (291 bal) və Aysunay Abdulova (283 bal) kimi yüksək nəticəli şagirdlər izləyir. Məktəbin direktoru Qalib Bəşirov bu uğurları müəllim-şagird-valideyn əməkdaşlığının bəhrəsi olaraq qiymətləndirib.

E.Məmmədov adına 3 nömrəli məktəb-lisey: ardıcıl uğurlar

Liseyin XI sinif şagirdlərindən 16-sı 200 baldan artıq nəticə göstərib. Ən yüksək nəticə Ramiz Əliyevə məxsusdur – 285 bal. Ardınca Ağa Süleymanlı (273 bal) və Əli Abasov (268 bal) gəlir.

Ağahüseyn Aslanov adına 2 nömrəli tam orta məktəb: həm bal, həm medal

Bu məktəbdə 14 nəfər 200 baldan yuxarı nəticə göstərib. Ən yüksək nəticə Cəbrayıl Cabbarova məxsusdur – 291.2 bal. Digər yüksək nəticə göstərənlər arasında Sona Bəkirova (285.8 bal) və Nihal Mərdanlı (279.4 bal) da var. Bundan əlavə, məktəb şagirdləri Respublika fənn olimpiadasında qazandıqları qızıl və gümüş medallarla fərqləniblər. Bir neçə şagird məktəbi “qızıl nişan”la bitirməyə namizəddir.
Onu da qeyd edək ki, bu məktəbin XI “b” sinfinin 20 şagirdindən 12-si 200 baldan artıq nəticə göstərib. Onların 8-i 270 baldan, 4 nəfəri isə 230 baldan çox nəticə əldə edib.

Şamaxı Avropa Liseyi: məqsədyönlü tədrisin bəhrəsi

Regionun digər yüksək nəticə göstərən məktəbi olan bu liseyin 15 şagirdi buraxılış imtahanlarında 200-dən çox bal toplayıb. Ləman Məmmədova (277 bal), Mələy Məmmədova (272 bal) və Adilə Səməndərova (268 bal) öz uğurları ilə fərqləniblər.

Əldə olunan nəticələr ümumi təhsil keyfiyyətinin artdığını, şagirdlərin imtahanlara savadlı və məqsədyönlü şəkildə hazırlaşdığını sübut edir.