İqtisadiyyat Nazirliyinin tabeliyində Dördüncü Sənaye İnqilabının Təhlili və Koordinasiya Mərkəzi (4SİM), Elm və Təhsil Nazirliyinin tabeliyində Təhsilin İnkişafı Fondu (TİF) və ABŞ-nin “Coursera” şirkətinin birgə təşkilatçılığı ilə ali təhsil müəssisələrinin nümayəndələrinin iştirakı ilə “Əmək bazarı və sənaye 4.0 çağırışları” mövzusunda “dəyirmi masa” keçirilib. 

“Azərbaycan müəllimi” xəbər verir ki, tədbirdə tədris proqramlarının müasir əmək bazarının tələblərinə uyğunlaşdırılması və mövcud proqramların onlayn tədris platformalarına inteqrasiyası ilə bağlı qlobal təcrübələr müzakirə edilib.

4SİM-in icraçı direktorunun müavini Soltan Bayramov təhsil sektorunun sürətlə dəyişən texnologiyalar dövrünə çevik uyğunlaşmasının elm və sənaye 4.0 klasterinin formalaşmasında mühüm rol oynadığını vurğulayıb. Qlobal rəqabət mühitində uğur qazanmaq üçün texnoloji yeniliklərin mənimsənilməsi və tətbiqinin mühüm olduğu qeyd edilib.

Dünyanın aparıcı onlayn təhsil platformalarından olan “Coursera” şirkətinin Tərəfdaşlıqlar üzrə baş direktoru Larisa Vitkroft və Müştəri uğuru üzrə baş meneceri Vera İqnatyeva qlobal təcrübədə universitet proqramlarının dünyanın qabaqcıl texnologiya şirkətlərinin və kurs təminatçılarının təqdim etdiyi məzmunlara inteqrasiyası üzrə təqdimatla çıxış ediblər. Təqdimatda həmçinin Azərbaycan üçün uyğunlaşdırılmış məzmunların və lokal tərəfdaşlıq mexanizmlərinin imkanlarına da toxunulub.

Sonra iştirakçılar əmək bazarında yeni trendlər, rəqəmsal bacarıqların rolu və tədris proqramlarının bu dəyişikliklərə adaptasiyası barədə fikir mübadiləsi aparıblar.