Martın 2-də Dövlət İmtahan Mərkəzi tərəfindən XI sinif üzrə təşkil edilən buraxılış imtahanında maksimal nəticə əldə edən 23 nəfərdən biri Qarabağ Regional Təhsil İdarəsinin tabeliyindəki Tərtər rayon Rövşən Kərimov adına Sarov kənd tam orta məktəbinin şagirdi Çinarə Quliyevadır. 

"Azərbaycan müəllimi" Çinarə ilə həmsöhbət olub. 

Çinarə deyir ki, yüksək nəticəsi onun həyəcanına daha da həyəcan qatıb. Növbəti imtahana ciddi hazırlaşması üçün motivasiya verib.

"Bu, başlanğıcdır. Növbəti uğurum üçün ilk addımdır. Artıq blok fənlərinə hazırlığımı gücləndirmişəm. İstirahətim, dərslərim üçün vaxtı bacardığım qədər düzgün bölməyə çalışıram. Məncə, fasiləsiz oxumaq mümkün deyil. Əsas kəmiyyət yox, keyfiyyətdir". 

Çinarə hər zaman ona inanan, onu dəstəkləyən valideynlərinin və müəllimlərinin də zəhmətinin çox olduğunu qeyd edir. O, hüquq ixtisası üzrə təhsilini Bakı Dövlət Universiteti, yaxud Azərbaycan Respublikası Prezidenti yanında Dövlət İdarəçilik Akademiyasında almaq istədiyini bildirir.

Bu gözəl qızla birgə sevinən anası ilə də həmsöhbət oluruq. Dönə-dönə sevincini dilə gətirir. Bütün valideynlərə bu sevinci yaşamağı arzulayır.

Elnarə xanım deyir ki, nəticəni eşitdiyi gündən yerə-göyə sığmırlar. 

"Biz kənddə yaşayırıq. Hər kəs maraqlanır ki, fərqli nə etdiniz? Bəlkə xüsusi hazırlıqlar olub? Xeyr. Sadəcə, kəndimizdə məktəbə gedib. Nəticəsini yaxşı gözləyirdik, amma bu qədər yox. Üzü ağ olsun, əziyyətimiz hədər getmədi. Kiçik bacı-qardaşı da ondan nümunə götürəcəklər".