İyulun 4-də Naxçıvan Muxtar Respublikası Təhsil Nazirliyi tərəfindən 2024-2025-ci tədris ilində şagird nailiyyətlərinin mükafatlandırılmasına həsr olunmuş tədbir keçirilib.

"Azərbaycan müəllimi" xəbər verir ki, tədbirdə əvvəlcə Ulu Öndər Heydər Əliyevin və Azərbaycan Respublikasının ərazi bütövlüyü uğrunda canlarından keçmiş şəhidlərin əziz xatirəsi bir dəqiqəlik sükutla yad edilib, Azərbaycan Respublikasının Dövlət Himni səsləndirilib.

Naxçıvan Muxtar Respublikasının təhsil naziri Elxan Nəcəfov şagirdləri, onların müəllimləri və valideynlərini təbrik edərək 2024-2025-ci tədris ilində Muxtar Respublikada təhsil sahəsində həyata keçirilən məqsədyönlü tədbirlər, əldə olunan uğurlarla bağlı məlumat verib.
Vurğulanıb ki, MR-də istedadlı şagirdlərin aşkara çıxarılması və onların elmi biliklərə yönləndirilməsi istiqamətində də ardıcıl və məqsədyönlü tədbirlər həyata keçirilib. Müsabiqə və olimpiadalarda uğurlu nəticələr əldə olunub.

Tədbirdə Naxçıvan Dövlət Universitetinin rektoru Elbrus İsayev bildirib ki, şagirdlərin təhsil menecerlərinin iştirakı ilə bir araya gəlməsi onlarda özünəinamın yaranmasında mühüm rol oynayır, gələcək fəaliyyətinə böyük dəstək verir.

Naxçıvan Qızlar Liseyinin məzunu, birinci cəhd blok imtahanlarında Naxçıvan Muxtar Respublikası üzrə ən yüksək, yəni 690 bal tolayan Sehrin Cəfərova öz uğur hekayəsini danışıb.

Tədbirdə “Naxçıvan Muxtar Respublikasının sosial-iqtisadi inkişafına dair 2023–2027-ci illər üçün Dövlət Proqramı”na uyğun olaraq təhsil sahəsində həyata keçirilən tədbirlər, Elm və Təhsil Nazirliyi ilə əməkdaşlıq və inteqrasiya fəaliyyətləri, müəllimlərin peşəkar inkişafı və şagird nailiyyətləririni artırılması ilə bağlı həyata  keçirilən tədbirlərlə bağlı videoçarx nümayiş olunub.

Tədbirdə olimpiada və müsabiqələrin qaliblərinə, idmanın müxtəlif sahələr üzrə uğur qazanan və xüsusi bacarığı ilə seçilən, buraxılış və qəbul imtahanlarında ən yüksək nəticə göstərən şagirdlərə, həmçinin “Gənc xilasedici və yanğınsöndürən” yarışının qalibi olmuş Naxçıvan şəhəri 1 nömrəli tam orta məktəbin şagirdlərinə hədiyyə və Təhsil Nazirliyinin diplomları təqdim olunub.
Tədbir bədii hissə ilə davam edib.