Azərbaycan Dövlət Mədəniyyət və İncəsənət Universitetində 2025-ci ilin “Konstitusiya və Suverenlik İli”nə həsr olunmuş “Pillə 3” Tələbə Tamaşaları Festivalı keçirilib. Festivalda Naxçıvan Dövlət Universitetinin Tələbə Teatr Studiyası da iştirak edib və Hüseyn Cavidin “Uçurum” əsəri əsasında hazırlanmış tamaşa təqdim olunub.

Universitetdən “Azərbaycan müəllimi”nə verilən məlumata görə, tamaşanın bədii rəhbəri universitetin Teatr və mədəniyyətşünaslıq kafedrasının müdiri, Azərbaycan Respublikasının Əməkdar mədəniyyət işçisi, filologiya üzrə fəlsəfə doktoru, dosent Gülxarə Əhmədova, quruluşçu rejissoru Azərbaycan Respublikasının Xalq artisti, NDU-nun İncəsənət fakültəsinin baş müəllimi Kamran Quliyevdir. Tamaşanın rəssamı İncəsənət fakültəsinin dekanı Cavid İsmayılov, musiqi tərtibatçısı Azər Cəfərli, rejissor assistenti isə IV kurs tələbəsi Ramal Mansırlıdır.

Səhnə əsərində Tələbə Teatr Studiyasının aktyor-tələbələri rol alıb. Onlar arasında Ramal Mansırlı, Hülya Əliyeva, Yusif Rzayev, Barış Cavadlı, Hüseyn Məmmədli, Ayşən Qaffarlı, Mehrac Rzayev, Məhəmməd Novruzov, Gülay Ağazadə və Burak Məmmədov yer alıblar.

Tamaşada insanın mənəvi böhranı, cəmiyyətin ziddiyyətləri, sevgi və nifrət, haqq və ədalət kimi dərin ictimai-mənəvi mövzular işlənib. NDU Tələbə Teatr Studiyasının bu uğurlu çıxışı festival iştirakçıları tərəfindən maraqla qarşılanıb.