“SABAH qrupları ETN nəzdində olmayan ADA Universitetinin, Bakı Ali Neft Məktəbinin, Xəzər Universitetinin nəzdində ola bilər. Bu istiqamətdə məsələlərə baxılır. Ümid edirəm ki, gələcəkdə SABAH qruplarının və yeni məzmunlu təhsil proqramlarının həm universitetlər, həm ixtisaslar üzrə genişlənməsi baş tutacaq”.

Bunu “Azərbaycan müəllimi”nə açıqlamasında elm və təhsil nazirinin müşaviri Nicat Məmmədli deyib.

Müşavir bildirib ki, SABAH qrupları layihəsi əvvəllər yalnız Elm və Təhsil Nazirliyinin tabeliyində olan ali təhsil müəssisələrinə şamil olunurdusa, bundan sonra o, digər qurumların tabeliyində olan, hətta özəl ali təhsil müəssisələrə də şamil olunacaq: “Əvvəl bu qruplar texniki, texnoloji istiqamətli idisə, artıq başqa istiqamətlərdə də qruplar təşkil ediləcək. İxtisasların istiqamətləri də artırılır. Əvvəllər daha çox üstünlük texniki, texnoloji ixtisaslara verilirdisə, artıq ixtisaslar şəbəkəsi də genişləndirilib. Digər ixtisaslar üzrə təhsil alan tələbələrin də SABAH qrupları kimi məzmunlu təhsil proqramlarında təhsil almaq imkanları təmin olunacaq. Bu da təhsilin keyfiyyətinin yaxşılaşdırılması istiqamətində atılan növbəti addımlardan biridir”. 

Nazirin müşaviri əlavə edib ki, SABAH qruplarının təşkili zamanı universitetlərin göstəriciləri nəzərə alınacaq: “Vacib məsələlərdən biri SABAH qruplarının yaradılması mexanizmləridir. Bu mexanizmlərə görə, tələbənin yaxşı akademik göstəricisi ilə yanaşı, universitetlərin də göstəriciləri əsas götürüləcək. Burada həm infrastruktur, həm də professor-müəllim heyətinin səviyyəsi əsas götürüləcək. SABAH qrupları yalnız bu meyarlara cavab verən ali təhsil müəssisələrində təşkil ediləcək. İnfrastrukturu varsa, professor-müəllim heyətinin səviyyəsi yüksəkdirsə, tələbələri yaxşı oxuyursa, SABAH qrupları təşkil edilə bilər”.