Respublika fənn olimpiadalarının rayon (şəhər) mərhələsində Mil-Muğan Regional Təhsil İdarəsinin tabeliyindəki məktəblərin 425 şagirdi uğur qazanaraq növbəti mərhələyə - yarımfinala keçə bilib. Həmin şagirdlərin yalnız biri maksimum nəticə əldə edib. 

"Azərbaycan müəllimi" riyaziyyat üzrə ən yüksək bal toplayan həmin şagirdlə - Rəvan Zeynallı ilə həmsöhbət olub.

“Kiçik yaşlarımdan müsabiqələrdə iştirak edirəm”

Rəvan Zeynallı 2008-ci ildə İmişli şəhərində anadan olub. Hazırda İmişli şəhəri N.Nərimanov adına 1 nömrəli məktəb-liseyin 11-ci sinfində oxuyur. O deyir ki, kiçik yaşlarından müsabiqələrdə iştirak edir. Düşünür ki, müsabiqə və olimpiadalarda iştirak özünüinkişaf üçün ən yaxşı üsullardandır:

"Olimpiadada iştirak etməyimin əsas səbəbkarları müəllimlərim və məktəbimizin direktoru Yusif Hüseynovdur. Onlar mənə bu olimpiada haqqında məlumat verdilər və uğur qazanacağıma inandıqlarını dedilər. Valideynlərim və bacım da mənə dəstək oldu. Olimpiadada iştirak etmək qərarına gələndən sonra əvvəlki illərin suallarına nəzər yetirdim və gördüm ki, onları cavablandıra bilirəm. Beləliklə, olimpiadaya hazırlaşmağa başladım və müəllimlərim də mənə bu hazırlıqda yardım etdilər.

Əslində, yarışda iştirak edərkən sualları səhvsiz yazacağıma inanırdım. Amma texniki səhvlər gedə bilərdi. Buna baxmayaraq, 100 faiz nəticə göstərəcəyimə əmin idim. Nəticələr elan olunanda gözləntilərim öz təsdiqini tapdı".

Rəvan Zeynallı əvvəlki illərin uğurları barədə həvəslə danışaraq deyib ki, o daha əvvəl də bir çox müsabiqələrin qalibi olub:

"Kenquru Beynəlxalq Riyaziyyat Müsabiqəsi də bunlardan biridir. Bu müsabiqənin gümüş medalçısı olmuşam. Bundan başqa, rayonumuzda keçirilən "Kim? Nə? Hara?" intellektual bilik yarışmasında qızıl medal qazanmışam. İTV kanalında nümayiş olunan "Əlaçı” proqramında iştirak etmişəm. Kiçik yaşlarımda şahmatla məşğul olmuşam və çoxsaylı uğurlar əldə etmişəm".

Müsahibim yekunda qeyd edib ki, hazırda buraxılış imtahanı ilə yanaşı, olimpiadanın yarımfinalına da hazırlaşır. İnanır ki, bu dəfə də qalib olacaq.