Dünəndən müəllimlərin sertifikatlaşdırılma imtahanlarına start verilib. Şirvan-Salyan Regional Təhsil İdarəsi üzrə imtahan Salyan şəhəri Nizami Gəncəvi adına 2 nömrəli tam orta ümumtəhsil məktəbində təşkil olunub. 

“Azərbaycan müəllimi” imtahan mərkəzində prosesin gedişatını izləyib, bir neçə müəllimlə söhbət edib. 

Nicat Qarayev Biləsuvar rayonu Muğan kənd ümumi orta məktəbinin coğrafiya müəllimidir. Nicat müəllim imtahanla bağlı təəssüratlarını bizimlə bölüşdü: "İmtahanda 59 bal topladım. İmtahana ciddi hazırlaşmırdım. Amma çox vaxt sınaqlara baxırdım. İmtahan əla keçdi. Vaxtından 35 dəqiqə əvvəl imtahandan çıxdım. Suallar normal idi. Qarışıq sual yox idi. Müəllim sadəcə imtahan qabağı yox, daim öz üzərində işləməlidir. Sertifikasiya imtahanı ən azından hamıya müəllim olduğunu xatırladır, həmçinin maddi dəstəkdir".

İlkin Ağamalıyev imtahanda 56 bal toplayıb. O, Hacıqabul rayonu Muğan qəsəbə tam orta məktəbin coğrafiya müəllimidir. İlkin müəllim imtahana hazırlığı və imtahanın gedişi barədə fikirlərini bizimlə bölüşdü: "İmtahana bir il ərzində davamlı olaraq, gündəlik minimum 2-3 saat, orta məktəb dərsliklərindən və test vəsaitlərindən istifadə edərək hazırlaşmışam. Suallar asan, orta, çətin olaraq bölüşdürülmüşdü və orta məktəb proqramını əhatə edirdi. İmtahan prosesi çox şəffaf keçirildi, təşkilatçılıq yüksək səviyyədə idi. İmtahana əzmlə, yorulmadan hazırlaşmaq, bütün yeniliklərlə tanış olmaq lazımdır. Sertifikasiya imtahanı müəllimlərin öz üzərində çalışması üçün əhəmiyyətli bir prosesdir".

Nəzrin Quliyeva Şirvan şəhər 20 nömrəli tam orta ümumtəhsil məktəbinin ibtidai sinif müəllimidir və imtahanda 54 bal toplayıb. O, imtahanla bağlı təəssüratlarını bizimlə paylaşdı: "İmtahana hazırlıq mənim üçün ağır olub. Çünki bu il 4-cü sinif və məktəbəhazırlıq qrupu ilə məşğul olmaq kifayət qədər yorucu olub. Suallar orta səviyyədə idi. Ona görə də müəllimlər qorxmasın. İmtahan prosesi çox şəffaf və qaydasında keçdi".

Qeyd edək ki, sözügedən mərkəzdə dünən 83, bu gün isə 241 müəllim imtahan verib.