Azərbaycan Dövlət Pedaqoji Universitetinin (ADPU) Şamaxı filialında Azərbaycan ədəbiyyatının görkəmli nümayəndəsi, böyük şair və maarifçi Seyid Əzim Şirvaninin 190 illiyinə həsr olunmuş “Aləmdə səsim var mənim…”  respublika elmi konfransı keçirilib.

Bu barədə "Azərbaycan müəllimi"nə ADPU-nun Şamaxı filialından məlumat verilib. 

Tədbirdə Şamaxı rayon İcra Hakimiyyəti və ADPU-nun rəhbərliyi, Azərbaycan Yazıçılar Birliyinin Şirvan bölməsinin şair və yazarları, ölkənin nüfuzlu elm və təhsil ocaqlarından alimlər, Şamaxı təhsil nümayəndələri, filialın kollektiv üzvləri, məzun və tələbələri iştirak ediblər.

Şamaxı rayon İcra Hakimiyyətinin başçısı Tahir Məmmədov çıxışında bildirib ki, Seyid Əzim Şirvani kimi şəxsiyyətlərin irsi gənc nəslin milli-mənəvi dəyərlərlə tərbiyəsində əvəzsiz rola malikdir. O, belə tədbirlərin yalnız yubiley qeydindən ibarət olmayıb, milli kimliyin möhkəmləndirilməsinə xidmət etdiyini vurğulayıb.

ADPU-nun rektoru professor Cəfər Cəfərov şairin maarifçilik fəaliyyəti və pedaqoji fikirlərinə toxunaraq, onun məktəb və müəllim anlayışlarına verdiyi önəmin bu gün də aktuallığını saxladığını qeyd edib.

Prezident təqaüdçüsü, filoloq alim və ADPU-nun Beynəlxalq Əlaqələr üzrə prorektoru, professor Mahirə Hüseynova çıxışında Seyid Əzim Şirvaninin ədəbi irsinə filoloq baxışını təqdim edib, onun yaradıcılığının realizm, satira və didaktikanın uğurlu vəhdətini əks etdirdiyini diqqətə çatdırıb.

ADPU-nun Şamaxı filialının direktoru dosent Tünzalə Yusifova konfransın elmi, pedaqoji və mənəvi əhəmiyyətindən danışaraq, Seyid Əzim Şirvaninin ideyalarının milli dəyərlərə sevgi və elmin təşviqinə xidmət etdiyini vurğulayıb.

Açılış mərasimi Dağlıq Şirvan Regional Mədəniyyət İdarəsinin “Eşq” ansamblının və Şamaxı filialının tələbələrinin ifasında Seyid Əzim Şirvaninin qəzəllərindən ibarət kompozisiya ilə davam edib.

Konfrans 6 bölmədə 200-dən artıq məqalə ilə ADPU-nun Şamaxı filialında işini davam etdirib. Tədqiqatçılar şairin poeziyası, pedaqoji baxışları, ədəbi mühiti və dövrünün ictimai-siyasi prosesləri ilə bağlı araşdırmalar təqdim ediblər.