Bir neçə gündür ki, ölkəmizin təhsil müəssisələrində sertifikasiya imtahanları keçirilir. İlk dəfədir ki, işğaldan azad olunmuş bölgələrimiz də sertifikasiya imtahanlarına qatılıb. 

Xankəndidəki Nizami Gəncəvi adına 4 nömrəli tam orta məktəbin müəllimi Xəyalə Sultanova və Şuşa şəhər 1 nömrəli tam orta məktəbin müəllimi Aynur Abbasova da sertifikasiya imtahanında iştirak edərək yüksək nəticə əldə ediblər. Hər ikisi ixtisasca coğrafiya müəllimidir.

Qazandıqları nəticədən və bundan sonra Xankəndi və Şuşa məktəblərində pedaqoq kimi çalışacaqlarından qürur duyduqlarını bildirirlər.

Xəyalə Sultanova Azərbaycan Dövlət Pedaqoji Universitetini bitirib və bu ali məktəbdə magistratura təhsili də alıb. Deyir ki, Xankəndi kimi bir bölgədə çalışmaq təkcə qürurlanmaqla bitmir, həm də böyük məsuliyyətdir, burada daha çox müharibənin ağrı-acısını yaşamış qarabağlı ailələrin, şəhid və hərbçi ailələrin övladları təhsil alır. “Müasir uşaqlar daha praqmatik, ağıllı və fəaldırlar. Buna görə də müəllimlər daim özlərini təkmilləşdirməlidirlər. Sertifikatlaşdırma da təhsildə keyfiyyətin artılılmasına və müəllimlərin davamlı inkişafına yönəlmiş prosesdir”.

Xəyalə Sultanova sertifikatlaşdırmada 57 bal toplayıb. “Bu imtahan mənə mənəvi güc və inam verdi, məsuliyyətimi, diqqətimi artırdı. Amma əvvəldən yaxşı nəticə toplayacağıma əmin idim, çünki hazırlaşırdım, ixtisas suallarını 100%, kurikulum suallarını 60% doğru cavablandırdım. Məncə, ixtisasını bilən, peşəsini sevən hər bir müəllim bu imtahandan yüksək nəticə qazana bilər, buna heç kimin şübhəsi olmasın”. 

Aynur Abbasova Bakı Dövlət Universitetinin məzunudur. 2024-cü ildə ailəsi ilə birlikdə Şuşa şəhərinə köçüb. Hazırda Şuşadakı 1 nömrəli məktəbdə çalışır. İmtahandan 55 bal toplayıb. Vaxtilə Şuşanı görməyi xəyal belə edə bilməyən Aynur Abbasova indi orada müəllim kimi çalışır. O, imtahan təəssüratlarını bizimlə bölüşüb:

“Suallar proqrama uyğun tərtib olunub, öz üzərində hazırlaşan, yeniliklərdən xəbərdar olan müəllimlərin hər biri bu imtahandan keçə bilər. Əlbəttə, bu imtahandır, çətin suallar da olur, mənim də suallarımın içində çətinləri vardı. Amma özümə güvənirdim. Kəsilsəydim, Şuşa kimi bir şəhərdə çalışmaq şansımı itirsəydim, bu, bağışlamayacağım səhvim olardı. Qazanmalıydım və qazandım. İşimə davam edəcəyəm, şagirdlərimlə yenidən görüşəcəyəm. Bildiklərimi, xalqımızın son illər yaşadıqlarını onlara qürurla anlada biləcəyəm. Ölkəmizin coğrafiyasını, iqlimini, torpağını, suyunu onlara sevərək öyrədəcəyəm. Sertifikasiyada uğur qazanmaqla şəhidlərimiz qarşısındakı borcumu da yerinə yetirmiş oldum. Onlar bu Vətəni bizə əmanət ediblər, əmanətə isə xəyanət olmaz”.