Gəncə Dövlət Universitetində (GDU) Ulu Öndər Heydər Əliyevin anadan olmasının 102 illiyinə həsr olunmuş “Təbiət və sosial elmlər sahəsində qlobal çağırışlar” mövzusunda beynəlxalq elmi konfrans keçirilib.
"Azərbaycan müəllimi" xəbər verir ki, konfransda Gəncə Şəhər İcra Hakimiyyəti, YAP Gəncə şəhər təşkilatı və Türkiyə Respublikasının Gəncədəki Baş Konsulluğunun nümayəndələri, eləcə də Türkiyə, Rusiya, Qazaxıstan, Tacikistan, Özbəkistan və Gürcüstandan gəlmiş alimlər, tədqiqatçılar, universitet rektorları və elmi-tədqiqat institutlarının təmsilçiləri iştirak ediblər.
Tədbirdə Ulu Öndərin abidəsi ziyarət olunub, xatirəsi ehtiramla yad edilib. Daha sonra sərgi nümayiş etdirilib, Dövlət Himni səsləndirilib və Heydər Əliyevin siyasi irsinə həsr olunmuş videoçarx təqdim olunub.
Universitetin rektoru Yusif Yusibov açılış nitqində Ulu Öndərin elm və təhsilin inkişafına verdiyi töhfələrdən danışıb. Qeyd olunub ki, bu konfrans müasir kimya, biologiya, fizika, aqrar və sosial elmlərin aktual problemlərinə həsr olunub, 500-dən çox elmi məqalə 5 cilddə nəşr edilib.
Konfransda Gəncə Şəhər İcra Hakimiyyətinin başçısının müavini Adil Tağıyev, YAP Gəncə şəhər təşkilatının sədri Bayram Aslanov, Türkiyə və digər ölkələrdən olan tanınmış alimlər çıxış edərək tədbirin əhəmiyyətindən və elmi əməkdaşlığın gücləndirilməsindəki rolundan bəhs ediblər.
Akademik Vaqif Abbasov və AMEA-nın müxbir üzvü, professor Vaqif Novruzovun qlobal ekoloji problemlər, təmiz ətraf mühit və ekoloji tarazlıq mövzularında məruzələri dinlənilib.
Konfrans 16 bölmə üzrə iclaslarla davam edib. Yerli və xarici universitetlərin professorlarının iştirakı ilə tələbə və müəllimlər üçün ustad dərsləri təşkil olunub.