Mərkəzi Aran Regional Təhsil İdarəsi, Mingəçevir şəhər 11 nömrəli tam orta məktəbin builki məzunu Arif Pərviz oğlu Hüseynli qəbul imtahanlarında topladığı 692.3 ballıq nəticə ilə təkcə regionun deyil, respublikanın da diqqətini çəkib. Arif buraxılış imtahanında 292.3, II ixtisas qrupu üzrə qəbul imtahanında isə maksimal – 400 bal toplayıb. 

Arifin uğuru təsadüfi deyil. O, ibtidai sinifdən intellektual müsabiqələrdə, fənn olimpiadalarında və idman yarışlarında aktiv iştirak edib. Riyaziyyat və fizika fənləri üzrə Respublika fənn olimpiadalarının final mərhələlərinə yüksəlib, şəhər və regional mərhələlərini uğurla keçib. 2023-cü ildə Respublika fənn olimpiadalarının riyaziyyat, 2025-ci ildə isə fizika üzrə final mərhələlərinin iştirakçısı olub. Eyni zamanda 28 May – Respublika Gününə həsr olunmuş kikboksinq üzrə Azərbaycan Kuboku yarışında III yerə layiq görülüb.

Təhsildə qazandığı yüksək nəticələr, fəxri fərmanlar və sertifikatlar onun illərlə apardığı sistemli hazırlığın sübutudur. Müxtəlif bilik yarışmalarında, məktəbdaxili və məktəblərarası tədbirlərdə daim yüksək göstəricilər nümayiş etdirib.

Valideyni Pərviz Hüseynli oğlunun bu yolda göstərdiyi əzmə diqqət çəkərək bildirdi ki, “İstiqamət verməyə çalışdım, amma seçimlərində sərbəst oldu. Arif bu sahəyə marağını çox erkən yaşlarda göstərmişdi. Müəllimlərimizə dərin təşəkkür düşür – dəstəkləri daim hiss olunurdu”.

Arif isə gələcəklə bağlı hədəflərini belə ifadə edir:

“Tibb sahəsində boşluqların və sirri açılmamış mövzuların çox olduğunu görürəm. Gələcəkdə ATU-da oxuyaraq bu sahədə yeniliklər etmək, araşdırmalar aparmaq və tibb dünyasına real töhfələr vermək istəyirəm”.

Onun nəticəsi fərdi nailiyyət olmaqla yanaşı, müəllimin əməyinə, ailənin dəstəyinə və şagirdin məqsədyönlü zəhmətinə əsaslanan parlaq bir təhsil nümunəsidir.