Mayın 17-də beşinci “Yüksəliş” müsabiqəsinin əyani mərhələsinin ilk imtahanına start verilib. İki gün davam edəcək Analitik təhlil imtahanı 4 sessiyada keçirilir.

“Azərbaycan müəllimi” xəbər verir ki, imtahanlar Dövlət İmtahan Mərkəzinin Elektron İmtahanlar Korpusunda, Elm və Təhsil Nazirliyinin tabeliyində olan 153, 158, 161, 229 və 238 nömrəli məktəblərdə, həmçinin Sumqayıt şəhərində yerləşən 1 nömrəli tam orta məktəbdə təşkil olunub. Naxçıvan şəhərində isə imtahan mayın 18-də keçiriləcək.

Namizədlər imtahanda öncədən seçdikləri 10:00 və 15:30 saatlarında iştirak edirlər. Eyni zamanda, xaricdə yaşayan namizədlər üçün də imtahanlar distant formatda, proktorinq üsulu ilə təşkil edilib.

Əyani mərhələnin birinci turu olan Analitik təhlil imtahanında ümumilikdə 7256 namizəd iştirak hüququ qazanıb. İmtahan Verbal, Rəqəmsal və Abstrakt təhlil olmaqla 3 blok üzrə aparılır və ümumi müddəti 3 saatdır.

Ədalətli rəqabəti təmin etmək məqsədilə test sualları beynəlxalq səviyyədə tanınan T-şkala ilə hesablanır. Bu metod TOEFL, GMAT, SAT kimi imtahanlarda da geniş tətbiq olunur və nəticələrin obyektivliyini təmin edir. İmtahan nəticələrinin 5-7 iş günü ərzində iştirakçılara hesabat şəklində göndərilməsi nəzərdə tutulur.

Qeyd edək ki, “Yüksəliş” müsabiqəsi Azərbaycan Respublikasının Prezidenti İlham Əliyevin 26 iyul 2019-cu il tarixli Sərəncamı ilə təsis olunub.

Qaliblərə birillik fərdi inkişaf planı və 20 min manat məbləğində mükafat təqdim edilir. Müsabiqənin bu ilki – beşinci çağırışının keçirilməsi ilə bağlı müvafiq sərəncam Prezident İlham Əliyev tərəfindən 18 dekabr 2024-cü il tarixində imzalanıb.