Bir neçə gün əvvəl məktəbəqədər təhsil müəssisələrində tərbiyəçi-müəllim və metodistlərin peşəkarlıq səviyyəsinin yoxlanılması məqsədilə diaqnostik qiymətləndirmə keçirilib.

“Azərbaycan müəllimi” Şirvan-Salyan Regional Təhsil İdarəsi üzrə yüksək bal toplayan tərbiyəçi-müəllimlərlə həmsöhbət olub.

İlk müsahibimiz Rəqsanə Ağazadə Biləsuvar rayon A.Usubov adına Xırmandalı kənd uşaq bağçasında çalışır. O, məktəbəqədər təhsil müəssisələrində pedaqoji fəaliyyətlə məşğul olan tərbiyəçi-müəllim və metodistlərin diaqnostik qiymətləndirilməsi imtahanında 56 bal toplayıb. O imtahana hazırlaşması və imtahanın necə keçməsi ilə bağlı təəssüratlarını bizimlə bölüşüb:

“İmtahan şəffaf təşkil olunmuşdu. Suallar ixtisası tam əhatə edirdi. Özümü imtahan prosesində çox rahat hiss edirdim. İmtahana hazırlaşmağım uzunmüddətli bir proses idi. Universitetdə oxuduğum illərdən bu günə qədər ixtisasımla bağlı oxuduğum hər kitabın bu nəticəyə öz təsiri var. Diaqnostik qiymətləndirmə 56 bal topladım. İmtahanda heç bir çətinliyim yox idi. Həmçinin imtahan mühiti çox gözəl təşkil olunmuşdu. Belə imtahanları olduqca yaxşı dəyərləndirirəm. Düşünürəm ki, özünü qiymətləndirmə həyatın hər mərhələsində önəmlidir”.

Təriqət Eyvazova isə Hacıqabul şəhər 1 nömrəli uşaq bağçasında tərbiyəçi-müəllim olaraq fəaliyyət göstərir. O da imtahanın gedişi və imtahana necə hazırlaşması ilə bağlı fikirlərini bizimlə bölüşüb:

“Mənə görə imtahan yaxşı keçdi. 54 bal toplamışam. Ötən il tərbiyəçi-müəllimlərin işə qəbul imtahanında iştirak etdiyim üçün mövzular mənə tanış idi. Diaqnostik qiymətləndirməyə hazırlaşarkən həmin mövzuları təkrarlayaraq biliklərimi möhkəmləndirdim. Amma qeyd edim ki, bəzi suallar çətin idi. Belə imtahanların olması biz tərbiyəçilərin peşəkarlığının artırılması, biliklərinin təkmilləşdirilməsi, məktəbəqədər təhsil səviyyəsinin yüksəldilməsi üçün çox yaxşı addımdır. Düşünürəm ki, biz daim öz üzərimizdə işləməli, dəyişən dövrün tələblərinə uyğunlaşmalıyıq ki, verdiyimiz tərbiyə və təhsil daha keyfiyyətli olsun”.

Qeyd edək ki, Şirvan-Salyan Regional Təhsil İdarəsi üzrə məktəbəqədər təhsil müəssisələrində pedaqoji fəaliyyətlə məşğul olan tərbiyəçi-müəllim və metodistlərin diaqnostik qiymətləndirilməsi imtahanı oktyabrın 20-də keçirilib. İmtahanda sözügedən təhsil idarəsi üzrə 218 nəfər iştirak edib.