“Azərsun Holding”in Kənd təsərrüfatı üzrə baş direktoru Məhəmməd Gözəl və rəhbərlik etdiyi nümayəndə heyəti Azərbaycan Dövlət Aqrar Universitetində (ADAU) olub.

“Azərbaycan müəllimi” xəbər verir ki, əvvəlcə qonaqlarla görüşən universitetin rektoru Zəfər Qurbanov birgə kadr və mütəxəssis hazırlığı sahəsində əməkdaşlığın genişləndirilməsi məsələlərini müzakirə ediblər.

Daha sonra Elm və Təhsil Nazirliyinin ali təhsil üzrə yeni təhsil proqramlarının hazırlanması məqsədilə yaratdığı Komissiyanın tərkibində formalaşdırılmış Kənd təsərrüfatı ixtisasları qrupu üzrə İşçi qrupunun növbəti iclası keçirilib. Tədbirdə İşçi qrupunun üzvləri, bir qrup ali təhsil müəssisələrinin professor-müəllim heyəti, Kənd Təsərrüfatı Nazirliyinin (KTN), elmi-tədqiqat institutlarının, əmək bazarı və digər müvafiq qurumların təmsilçiləri iştirak ediblər.

ADAU-nun rektoru, İşçi qrupunun həmsədri Zəfər Qurbanov iclası giriş sözü ilə açaraq qarşıda duran məsələlərdən danışıb və İşçi qrupunun ilk iclasından bəri icra edilmiş işlər barədə məlumat verib.

İşçi qrupunun həmsədri Məhəmməd Gözəl qrup üzvlərini salamlayaraq iclasın gündəliyinə diqqət çəkib.

Daha sonra işçi qrupunun üzvü, ADAU-nun tədris şöbəsinin müdiri, dosent Elay Zeynallı alt işçi qrupların müzakirə nəticələrini İşçi qrupunun nümayəndələrinə təqdim edib. O bildirib ki, proqram üzrə təsdiqi təklif edilən ixtisaslaşmalar müəyyən edilərkən ali təhsil müəssisələri və əmək bazarının təklifləri ilə yanaşı, xüsusilə də elmi-tədqiqat institutlarının və xarici ali təhsil müəssisələrinin magistratura ixtisaslaşmaları əsas götürülüb.

İşçi qrupunun müzakirələri nəticəsində kənd təsərrüfatı ixtisasları üzrə bir neçə yeni ixtisaslaşmaların əlavə olunması, bəzilərinin adının dəyişdirilməsi, bəzi ixtisaslaşmaların isə ləğv olunmasına qərar verilib.

Qeyd edək ki, “Bağçılıq və tərəvəzçilik”, “Bitki mühafizəsi”, “Heyvandarlıq elmləri” və “Zoomühəndislik” ixtisasları üzrə isə ilk dəfə magistratura səviyyəsində ixtisaslaşmalar müəyyən edilib. Sonda kənd təsərrüfatı ixtisasları üzrə ixtisaslaşmaların siyahısı səsvermə ilə təsdiq edilib.

Görüşdən sonra qonaqlar Aqrar Universitetin müasir laboratoriyaları ilə yaxından tanış olub, Gəncə Dövlət Aqrar Kollecində olublar.