“Universitetlər əmək bazarının tələblərini öyrənməli və buna uyğun fəaliyyət göstərməlidir”.

“Azərbaycan müəllimi” xəbər verir ki, bunu elm və təhsil nazirinin müşaviri Nicat Məmmədli İTV-nin “Sabaha saxlamayaq” proqramında səsləndirib.

O, əmək bazarı ilə universitetlər arasında əlaqələrin qurulması sahəsində ciddi problemlərin mövcud olduğunu bildirib. Müşavir qeyd edib ki, universitetin əmək bazarındakı çəkisi, məzunlarının işə düzəlmə göstəricisi onun reytinqinə birbaşa təsir edir.  

“Bizim universitetlər fəaliyyətlərini müəyyən ətalətlə sürdürüblər. Elə bir fikir yaranıb ki, dövlət müəyyən sifariş verir və onlar da bu sifariş əsasında fəaliyyət göstərirlər. Əslində, bu proses belə olmamalıdır. Universitetlər daha çevik qurumlar olmalıdır”, – deyə Nicat Məmmədli bildirib.

Müşavir həmçinin vurğulayıb ki, tədris proqramlarının mütəmadi olaraq dəyişdirilməsi təmin edilir. Əsas və seçmə fənlərdən ibarət proqramların hazırlanması universitetlərin ixtiyarına buraxılıb. Bu yanaşma tələbələrin maraqlandığı ixtisaslaşmaya uyğun alternativ dərslər təklif etməyə imkan yaradır.  

“Məsələn, on il əvvəl “sosial media menecerliyi” anlayışı yox idisə, bu gün artıq var. Universitetlər bu dəyişikliklərə çevik reaksiya verməlidir. Məsələn, Jurnalistika fakültəsində təhsil alan tələbələrə belə seçmə fənlər təklif edə bilərlər”, – deyə o əlavə edib.  

Nicat Məmmədli bildirib ki, universitetlərin əmək bazarının tələblərinə çevik reaksiya verməsi üçün mexanizmlər mövcuddur və bunun qarşısını alan heç bir maneə yoxdur.  

“Sadəcə olaraq, universitetlər əmək bazarı ilə işləməlidir. Hətta məzunları ilə sorğular keçirməli, onların keçdiyi dərslərin real praktikada istifadə olunub-olunmadığını araşdırmalıdırlar”, – deyə müşavir fikrini tamamlayıb.