Musiqi və incəsənət məktəblərində çalışan müəllimlərin attestasiya nəticələri açıqlanıb.

Mədəniyyət Nazirliyindən “Azərbaycan müəllimi”nə verilən məlumata görə, musiqi və incəsənət məktəblərində çalışan müəllimlərin attestasiyası zamanı əldə olunan nəticələr təhsil sahəsinin inkişafı baxımından müsbət göstəricilərlə yadda qalıb.  

Belə ki, attestasiya prosesindən uyğun qiymətlərlə keçən müəllimlərin böyük əksəriyyəti yüksək peşəkar səviyyədə qiymətləndirilib. Bu nəticə musiqi və incəsənət məktəblərində çalışan müəllimlərin yüksək potensiala sahib olduğunu göstərir.  

Xüsusilə, Bakı şəhəri üzrə Qara Qarayev adına Mərkəzi İncəsənət Məktəbi və 2 saylı Rəşid Behbudov adına İncəsənət Məktəbinin müəllimləri uğurlu nəticələr əldə ediblər. Həmin məktəblərin müəllimlərinin böyük əksəriyyəti attestasiyanı uğurla başa vurub ki, bu da bu təhsil müəssisələrinin keyfiyyətli təhsil verdiyini sübut edir.  

Attestasiyada yaşı 60-dan yuxarı olan müəllimlərin də əksəriyyəti müsbət qiymətləndirilib. Bu, yaşlı müəllimlərin təcrübə və müasir pedaqoji yanaşmalara uyğunlaşmalarının təhsildəki mühüm rolunu bir daha təsdiqləyir.  

Uğur qazana bilməyən, lakin gələcəkdə daha yaxşı nəticələr əldə etmək potensialına malik müəllimlər üçün işə qəbul imtahanlarında iştirak etmək hüququ saxlanılıb. Onlar MİQ imtahanlarında daha yüksək nəticə göstərdikləri təqdirdə məktəblərə qayıtmaq imkanı əldə edəcəklər.  

Bundan əlavə, yerli təhsili idarəetmə orqanlarında xüsusi komissiyalar yaradılacaq. Bu komissiyalar vasitəsilə uğur qazana bilməyən, lakin inkişaf potensialı olan müəllimlərə dəstək veriləcək, onların sosial statusları mərhələli şəkildə qiymətləndiriləcək və alternativ iş yerlərinə yönləndiriləcəklər.

Qeyd edək ki, Mədəniyyət Nazirliyinin sistemindəki musiqi və incəsənət məktəblərində çalışan müəllimlərin bilik və bacarıqlarının qiymətləndirilməsi məqsədilə attestasiya keçirilib. Bakı və Abşeron-Xızı regionlarında 47 məktəbdən 1759 müəllim attestasiya prosesinə cəlb olunub. 2025-ci ilin fevral-mart aylarında keçirilən attestasiya nəticəsində 1183 müəllim yüksək qiymətləndirilib. 492 müəllim isə vəzifəsinə uyğun hesab edilməyib. Onlara təlimlərdən sonra yenidən imtahan vermək imkanı yaradılacaq.

Attestasiya prosesi bütün ixtisasları əhatə etməklə 2026-cı ilədək davam edəcək.