Müəllimlik yalnız peşə deyil, bir missiyadır. Gənc yaşlarından bu missiyanı şərəflə yerinə yetirmək üçün çalışan, uğurla irəliləyən Rəna Məmmədzadə Göygöl şəhəri 6 nömrəli tam orta məktəbdə ingilis dili müəllimi kimi fəaliyyət göstərir. O, 2024-cü ildə keçirilən müəllimlərin işə qəbulu (MİQ) imtahanında 90 bal toplayaraq tədris etdiyi fənn üzrə region birincisi olub.

“Azərbaycan müəllimi” Rəna müəllimin təhsil yolunu öyrənmək üçün onunla söhbətləşib.

“İntizamlı çalışmaq əsas şərtdir”

Rəna Məmmədzadə uğurun sirrini belə izah edir:

“İntizamlı çalışmaq əsas şərtdir. Mən həftəlik cədvəl qurmuşdum. Vaxtımı çərçivəyə salaraq konkret planla hazırlaşırdım. Daha çox xarici mənbələrdən istifadə etmişəm. Üstəlik, süni intellektin imkanlarından da müntəzəm istifadə edirdim. Bu da hazırlıq prosesimə çeviklik və zənginlik qatırdı”.

Onun fikrincə, təkcə bilikli olmaq kifayət etmir:

“Bilikli olmaq vacibdir, amma bu intellekti düzgün idarə etmək daha vacibdir. Bu iki keyfiyyət bir-birindən ayrılmazdır”.

Region üzrə ən yüksək nəticəni əldə etməyinə görə çox sevindiyini gizlətməyən Rəna xanım bu uğurunun səbəbini daha çox  məsuliyyətli olmasında görür:

“Sertifikatlaşdırma imtahanından isə 59 bal toplamışam. Əlbəttə, bu nəticəm də məni sevindirmişdi. Amma özüm üçün hədəfi bir az da yüksəltdim. Növbəti sertifikatlaşdırma imtahanında daha yüksək nəticə əldə etməyə can atacağam. Məqsədim maksimum nəticə göstərməkdir”.

Texnologiya ilə zəngin dərslər və real tələblərə uyğunlaşma

Rəna müəllim şagirdlərini müasir təlim metodları ilə öyrədir. O, oyun əsaslı dərs modelləri – “Kahoot”, “Jeopardy” və digər texnoloji platformalardan aktiv istifadə edir. Müəllimlər üçün təşkil olunan təlimlərdə fəal iştirak edən Rəna müəllim burada öyrəndiyi xarici təlimçilərin metodlarını dərs prosesində tətbiq edir:

“Şagirdlərin marağını artırmaq üçün dərslərimdə oyun əsaslı yanaşmalardan istifadə edirəm. Eyni zamanda, şagirdlərdən gözlənilən bilik meyarları ilə daha məlumatlı olmaq mənə onların inkişafını daha dəqiq yönəltməyə imkan verir”.

Müasir müəllim kimdir?

“Müasir texnologiyaları dərsə inteqrasiya edə bilən müəllim müasir müəllimdir. Məncə, müəllim öyrənməyi heç vaxt dayandırmamalıdır”, - deyən Rəna müəllim müasir müəllimin vəzifələrini belə izah edir.

Şagirdlərlə münasibətdə isə səmimi, amma məsuliyyətli yanaşma nümayiş etdirir:

“Şagirdlərlə yaxınlıq vacibdir, amma ciddiyyət də qorunmalıdır. Məncə, şagirdlər sevdikləri müəllimlərin fənlərinə daha çox maraq göstərirlər”.

Yeni başlayan müəllimlərə isə 3 qızıl tövsiyəsi var:

“Qətiyyətli olun, fənninizi və şagirdlərinizi sevin, özünüzü daim inkişaf etdirin”.