“Bağçalar 200 manatdan 350 manata, hətta 400 manata qədər təhsil xidməti göstərə bilirlər. Təbii ki, mənim dediyim bütün bu rəqəmlər şərti məbləğlərdir. Biz onların hansı qiymətlə xidmət göstərməsindən asılı olmayaraq, 250 manatlıq hissəsini dövlət tərəfindən tənzimləyirik”.

“Azərbaycan müəllimi” xəbər verir ki, bunu Elm və Təhsil Nazirliyinin Satınalmalar və qrantlar sektorunun müdiri Vüsalə Əliyeva Təhsil TV-də yayımlanan “Təhsil saatı” verilişində səsləndirib.

O bildirib ki, bununla yanaşı, ayrıca tənzimləmə mexanizmi də mövcuddur: 

“Biz həmin bağçaların qrant proqramında iştirakını təmin edirik və onlara bir növ dəstək veririk ki, bu proqrama müraciət etsinlər. Bağçalar bizə müraciət edərkən ümumi təhsil haqqını 500 manata qədər təqdim edə bilirlər. Bizim qrant proqramımızda iştirak şərtlərindən biri də odur ki, təhsil haqqı 500 manatdan yuxarı olmamalıdır.

Bu qərar həm aldığımız geri dönüşlər, həm də apardığımız ilkin təhlillər əsasında formalaşıb. Təbii ki, proqramdan sonra daha detallı analizlər aparılacaq. Biz artıq müşahidə edirik ki, bəzi bağçalar əvvəlcə daha yüksək təhsil haqqı təyin etsələr də, bu proqramda iştirak edə bilmək üçün qiyməti endirirlər: “Yəni təhsil haqqı maksimum 500 manat ola bilər, 400, 300, hətta 250 manat da ola bilər. Bu, artıq bağçanın öz qərarından asılıdır. Amma yuxarı hədd – 500 manatdır və onun 250 manat hissəsini dövlət hər ay hər bir təhsilalan üçün ödəyir”.