Bakı Slavyan Universitetində (BSU) fəlsəfə fənni üzrə doktoranturaya qəbul imtahanını keçirmək üçün formalaşdırılmış müxtəlif universitetlərin nümayəndələrindən ibarət komissiya və ali təhsil müəssisələrinin təmsilçiləri ilə koordinasiya görüşü keçirilib.

Avqustun 25-də Bakı Slavyan Universitetində (BSU) mərkəzləşdirilmiş qaydada keçiriləcək fəlsəfə fənni üzrə doktoranturaya qəbul imtahanına hazırlıq məqsədilə imtahanqabağı Komissiya üzvləri ilə geniş tərkibdə koordinasiya görüşü təşkil olunub. 

Universitetdən “Azərbaycan müəllimi”nə bildirilib ki, Elm və Təhsil Nazirliyinin müvafiq əmrinə əsasən, BSU-da 14 ali təhsil və 1 elmi tədqiqat müəssisəsindən 157 nəfər iddiaçı üçün fəlsəfə fənni üzrə doktoranturaya qəbul imtahanı təşkil olunacaq.

Tədbirdə universitet rəhbərliyi, imtahan komissiyasının üzvləri ilə yanaşı müvafiq ali təhsil müəssisələrindən elm və innovasiya məsələləri üzrə prorektorlar və şöbə müdirləri, həmçinin təşkilati heyət iştirak ediblər. Görüş imtahan prosesinin şəffaflığını, obyektivliyini və beynəlxalq standartlara uyğunluğunu təmin etmək məqsədini daşıyırdı. 

İclasda çıxış edən rektor Anar Nağıyev iştirakçılara imtahanın keçirilmə mexanizmi, qiymətləndirmə meyarları, komissiya üzvlərinin funksional vəzifələri, eləcə də namizədlər üçün yaradılacaq şərait barədə ətraflı məlumat verib. İmtahan zamanı namizədlərin biliyinin obyektiv şəkildə qiymətləndirilməsi üçün müasir yanaşmaların tətbiqi, eyni zamanda komissiya üzvlərinin üzərinə düşən məsuliyyətin xüsusi önəm kəsb etdiyini vurğulayıb. Rektor qeyd edib ki, doktoranturaya qəbul prosesinin mərkəzləşdirilmiş qaydada təşkili Azərbaycan elmi mühitində yüksək ixtisaslı kadrların hazırlanmasına, doktorantura təhsilində keyfiyyətin artırılmasına və obyektiv seçim mexanizminin gücləndirilməsinə xidmət edir.

Müzakirələrdə komissiya üzvləri fikirlərini bildirərək, imtahan prosesinin təşkili və qiymətləndirmə meyarları ilə bağlı öz rəy və təkliflərini irəli sürüblər.

Koordinasiya görüşündə həmçinin imtahanın keçirilmə tarixi, gedişatı, namizədlərlə ünsiyyət qaydaları və imtahanın nəticələrinin operativ şəkildə elan edilməsi məsələləri də müzakirə olunub.

Qəbul imtahanlarının sentyabr ayının ilk həftəsində keçirilməsi planlaşdırılır.