Respublika fənn olimpiadalarının şəhər (rayon) mərhələsinin nəticələrinə əsasən, Şərqi Zəngəzur Regional Təhsil İdarəsinin tabeliyindəki ümumtəhsil müəssisələrinin 465 şagirdi yarımfinala vəsiqə qazanıb. Onlardan 3-ü informatika fənni üzrə maksimal nəticə göstərib. 

"Azərbaycan müəllimi" həmin şagirdlərlə həmsöhbət olub.

“Davamlı zəhmət və əzmkarlıq insanı uğura aparır”

İlk olaraq Kəlbəcər rayonu 56 saylı tam orta məktəbin 9-cu sinif şagirdi Bəxtiyar Nəcəfzadə ilə həmsöhbət oluruq. Bəxtiyar deyir ki, bu nailiyyət onun üçün başlanğıc nöqtədir. Qarşıda daha böyük hədəfləri var. O, informatika sahəsində biliklərini daha da artıraraq ölkəmizi gələcəkdə beynəlxalq yarışlarda təmsil etmək istəyir: 

“İnanıram ki, davamlı zəhmət və əzmkarlıq hər zaman insanı uğura aparır. Oxuduğum məktəbin bu nailiyyətimdə böyük rolu var. Burada nəzəri biliklərlə yanaşı, praktiki bacarıqlar da qazanıram. Başda məktəb rəhbərliyi olmaqla, bütün müəllimlərim mənə həmişə dəstək olublar, onların verdiyi məsləhətlər və göstərdikləri diqqət daha çox çalışmağıma təkan verib.

Təbii ki, əldə etdiyim nəticədə öz üzərimdə çalışmağım mühüm rol oynayıb. İnformatika fənninə marağım həmişə yüksək olub. Bu maraq məni mövzuları daha dərindən öyrənməyə, əlavə mənbələrdən yeni biliklər əldə etməyə həvəsləndirib. Bəzən çətinliklərlə qarşılaşsam da, ruhdan düşməmişəm. Qarşıya qoyduğum məqsədlərimə çatmaq üçün dayanmadan çalışıram.

Bu uğur təkcə mənim deyil, həm də məktəbimin, müəllimlərimin zəhmətinin qarşılıqlı nəticəsidir. İnanıram ki, bu nailiyyət gələcəkdə daha böyük uğurlar əldə etməyimə yol açacaq”.

“Kompüter mütəxəssisi olmaq  istəyirəm”

Növbəti maksimal nəticə göstərən məktəbli İsmayıl Məmmədovdur. O, Zəngilan rayonu 15 nömrəli məktəbin 10-cu sinif şagirdidir. 

Deyir ki, hələ kiçik yaşlarından informatikaya aid keçirilən yarış və olimpiadalara marağı olub. Bu marağı onu ötən il olimpiadada gümüş medal sahibi edib. 

"İnformatika fənni üzrə ötənilki olimpiadanın da birinci mərhələsində 100 faiz nəticə göstərmişdim. Nəticələrimə görə valideynlərimə, təhsil aldığım məktəbin kollektivinə minnətdaram. Məktəbimiz Qubadlı rayonu Dondar kənd məktəbi ilə eyni binada yerləşir. Birinci mərtəbədə Zəngilan, ikinci mərtəbədə Qubadlı məktəbi fəaliyyət göstərir. Hər iki məktəb uğurlarıma birgə sevinir, dəstək olur. Bu dəstək mənə daha çox motivasiya verir. Gələcəkdə kompüter elmləri üzrə mütəxəssis olmaq  istəyirəm".

“Əsas məqsəd finala çıxmaqdır” 

Digər yüksək nəticə əldə edən şagird Bəhram Gözəlovdur. 

O, Kəlbəcər rayonu 122 nömrəli tam orta məktəbin 10-cu sinfində oxuyur. Bəhramın informatikaya marağı onun qaliblər sırasında yer almasına səbəb olub.  Bəhram deyir: "Arxayınlaşmaq olmaz, indi əsas məqsəd finala çıxmaqdır. Daha çox çalışıb qalib olmağa çalışacağam".