Novruz Əliyev ali təhsil müəssisələrinə qəbul imtahanlarında uğurlu nəticə göstərən gənclərimizdən biridir. Bir neçə xarici universitetdən qəbul alan abituriyent təhsilini Türkiyədə davam etdirmək niyyətindədir: “Bir neçə universitetdə təqaüdlə təhsil almaq imkanı əldə etmişəm. Türkiyənin Xaricdə Yaşayan Türklər və Əqrəba İcmalar Baş İdarəsi (YTB) ilə Bursa Uludağ Universitetində “Komputer elmləri”, Qaradəniz Texniki Universitetində “Süni intellekt və məlumat mühəndisliyi”, Muğla Sıtkı Koçman  Universitetində “Proqram yazılımı” ixtisasına qəbul olmuşam. Artıq seçimimi etmişəm. Karadeniz Texniki Universitetində oxuyacağam. “Süni intellekt və məlumat mühəndisliyi” ixtisası günümüz üçün çox aktual ixtisaslardandır və düşünürəm ki, bu ixtisas üzrə kadrlara ölkəmizdə ehtiyac var”.

Oxuduğu müddətdə məktəbinin qüruru oldu

Novruz Əliyev XI sinif buraxılış imtahanında 272.9 bal toplayaraq Ağstafa şəhəri Asif Abdullayev adına 2 nömrəli tam orta məktəbi fərqlənmə ilə bitirib: “IX sinif buraxılış imtahanlarında da 266.9 bal toplamışdım və bu nəticə məktəbimiz üzrə ən yüksək göstərici idi”.

Novruz Əliyevin bir neçə universitetə qəbul olunması təsadüfi deyil. Onun hər uğurunun arxasında böyük zəhmət dayanır. Tam orta təhsil dövründə sadəcə dərs proqramlarını öyrənib, qətiyyətli bir şəkildə olimpiadalara da qatılıb. Riyaziyyat üzrə Respublika fənn olimpiadasında finala qədər yüksəlib: “Olimpiadalarda iştirak dünyagörüşümə, müstəqil fikir yürütmə bacarığıma, məntiqi təfəkkürümün inkişafına çox kömək etdi. Hətta yer tuta bilmədiyim yarışlardan belə nəsə qazanırdım”. 

Ən böyük qazancı beynəlxalq yarışlarda iştirak haqqıdır

Beləliklə, ölkə və beynəlxalq əhəmiyyətli bir çox yarışlarda uğur qazanıb. 

Novruz sadəcə akademik göstəriciləri, məktəbdə davamiyyəti, nümunəvi davranışı ilə yox, fəallığı, sağlam həyat tərzi, idmana marağı ilə də seçilib və qiymətləndirilib: “Məktəb illərində karate ilə də məşğul olmuşam. İdmanı çox sevirəm. Son bir neçə ildə idmanda fəallığım azalsa da, həyatımdan çıxartmaq fikrim yoxdur”. 

Hədəfi Azərbaycanda süni intellektin inkişafına töhfə verməkdir

Gələcəyini süni intellektlə bağlamaq istəyən Novruz Əliyevin iddiası da arzuları qədər böyükdür: “Təbii ki, gələcəkdə bu ixtisas üzrə öz vətənimə və millətimə xidmət edəcəyəm. Bu ixtisasın Azərbaycanda inkişafına çalışacağam”.