“Bu gün Azərbaycanda peşəsi olmayan kifayət qədər insan var. Dövlət strategiyasında əmək bazarında təmsil oluna bilməsi üçün həmin insanların peşə təlimlərinə cəlbi nəzərdə tutulur”.

“Azərbaycan müəllimi” xəbər verir ki, bu fikirləri Peşə Təhsili üzrə Dövlət Agentliyinin direktor müavini Kənan Mirzəyev “Lənkəran-Astara iqtisadi rayonunun inkişafında peşə təhsilinin rolu: İmkanlar və çağırışlar” mövzusunda Lənkəran şəhərində keçirilən regional konfransda səsləndirib.

“Bir ildir ki, Füzuli şəhərində peşə təhsili müəssisəsinin tikintisinə başlanılıb. Şuşa şəhərində isə peşə təhsili müəssisəsinin əsaslı təmirinə başlanılacaq. Ağdam, Qubadlı, Zəngilan rayonlarında peşə təhsili müəssisələrinin tikinti-layihələndirmə işləri aparılır. Böyük Qayıdışa dair Dövlət Proqramında peşə təhsili ilə bağlı məqamlar qeyd olunub”. 

Agentliyin direktor müavininin sözlərinə görə, region gənclərinin peşə təhsilinə cəlbi artıq prioritetdir. Regionlarda peşə təhsilinin əhatəsinin genişləndirilməsi gənclər üçün peşə təhsili imkanları yaratmağa xidmət edir. 

O əlavə edib ki, əksər peşə təhsili müəssisələri iri sahibkarlarla əməkdaşlıq edir. Tələbələrə sahibkarların istehsalat sahələrində təlimlər keçirilir: “Bu da bizim üçün sevindirici haldır ki, həmin tələbələrimiz məzun olana qədər əmək bazarına keçid üçün daha çox imkanlar əldə edirlər”.