Azərbaycan Dövlət Pedaqoji Universitetinin Beynəlxalq əlaqələr üzrə prorektoru, professor Mahirə Hüseynova Türk Dünyası Alim Qadınlar Şurasının sədri seçilib.

“Azərbaycan müəllimi” xəbər verir ki, o, bu vəzifəyə 3 May - Türk Millətçiliyi Günü münasibətilə Bakıda BZT Turan Akademiyası tərəfindən təşkil edilən tədbirdə seçilib. 

Toplantıda bu vəzifə üçün Özbəkistan Elm və Təhsil Nazirliyinin Məmun Universiteti və Ürgənc Dövlət Pedaqoji Universiteti tərəfindən bir sıra namizədlər irəli sürülüb. 

Toplantıda Özbəkistanın STARS Beynəlxalq Universiteti, Jurnalistika və Kütləvi Kommunikasiya Universiteti, Milli Tədqiqatlar Universiteti Daşkənd İrriqasiya və Aqrotexnika Avtomatlaşdırma İnstitutu, Özbəkistan–Finlandiya Pedaqogika Universiteti, Səmərqənd Dövlət Xarici Dillər Universiteti, Buxara Dövlət Universiteti, Əbu Əli İbni Sina adına Buxara Dövlət Tibb İnstitutu, İslam Kərimov adına Daşkənd Dövlət Texniki Universiteti, Daşkənd Tibb Akademiyası, Vebster Universiteti (Daşkənd), Turin Politexnik Universiteti Daşkənd Filialı, Kokand Pedaqoji Universiteti, Daşkənd Əczaçılıq Universiteti və Daşkənd Dövlət İqtisadiyyat Universiteti daxil olmaqla, 40-dan çox müəssisənin nümayəndə heyəti qatılıb. Tədbirdə Türkiyədən də çoxsaylı elm adamları iştirak edib.

2019-cu ildən etibarən bir qrup gənc və təşəbbüskar akademik tərəfindən təsis edilən BZT Turan Akademiyası beynəlxalq konqres, simpozium, təlim və elmi layihələr vasitəsilə bütün dünyadakı tədqiqatçıları bir araya gətirməyi qarşısına məqsəd qoyub.

Akademiya 27 fərqli ölkədən 68-dən çox elmi qurumla tərəfdaşlıq edir.