Gəncə şəhəri 13 nömrəli tam orta məktəbin məzunu olan Alı İsmayılov I ixtisas qrupu üzrə blok imtahanında 400 bal toplamaqla ümumilikdə ölkə üzrə yüksək nəticə göstərən abituriyentlər arasında yer alıb. Buraxılış imtahanı ilə birlikdə 697.5 bal toplayan Alının uğur hekayəsi öz hədəfini aydın görən, ruhdan düşsə də, yolundan dönməyən gəncin əzmli çalışmasının nümunəsidir.

“Azərbaycan müəllimi” Alının təəssüratlarını öyrənib. 

“Bəzi anlarda ruhdan düşməyimə baxmayaraq, əzmlə çalışmağa davam etdim”, – deyən Alı bu nəticənin təsadüf olmadığını söyləyir. Blok imtahanı daha çox bal qazandırdığı üçün əsas diqqətini riyaziyyat, informatika və fizika fənlərinə yönəldib. Riyaziyyat fənnini daha çox sevdiyini açıqlayan Alı bu sahəyə olan marağının nəticəyə necə təsir etdiyini vurğulayır:

"Xüsusi dərs planım olmasa da, hər gün ən azı üç saat dərs oxumağa çalışmışam. Davamlılıq və planlı yanaşma çox vacibdir. Özümü sıxmadan, amma nizamla çalışırdım”.

İnformasiya texnologiyalarına marağı isə hələ kiçik yaşlarından yaranıb. 

“Kompüterə marağım uşaq vaxtından vardı, bu səbəbdən İT sahəsinə daha yaxın hiss edirəm”, – deyən Alı ali təhsilini bu istiqamətdə davam etdirmək niyyətindədir. O, hazırda seçim qarşısındadır: Azərbaycanın ən nüfuzlu ali təhsil müəssisələrindən olan ya Bakı Ali Neft Məktəbi (BANM), ya da ADA Universitetində oxumaq istəyir.

Gələcək planları isə çox aydındır: “Özümü gələcəyin İT sahəsində savadlı bir kadrı kimi görürəm. Uğur qazanmaq üçün çox çalışmaqla yanaşı, güclü iradəyə sahib olmaq da vacibdir”.

Sonda uğur formulunu belə açıqlayır: “Yüksək nəticə əldə etmək üçün əzmlə, çox çalışmaq lazımdır. Uğur qazanmaq üçün çox çalışmaqla yanaşı, güclü iradəyə sahib olmaq lazımdır”.