Təhsil İnstitutu tərəfindən ümumi təhsil müəssisələrində metodik xidmətin qurulması və keyfiyyətinin artırılması məqsədilə həyata keçirilən “Müasir metodist” layihəsi üzrə təlimlər yekunlaşıb.

“Azərbaycan müəllimi” xəbər verir ki, təlim proqramı çərçivəsində iştirakçılara məktəbdaxili qiymətləndirmənin əsas komponentləri – diaqnostik, formativ və summativ qiymətləndirmə, həmçinin qiymətləndirmə vasitələrinin hazırlanması üzrə nəzəri biliklər və praktik bacarıqlar təqdim olunub. Bununla yanaşı, tədris prosesində oxuyub-anlama bacarıqlarının inkişafı, riyaziyyatın tədrisi metodikası, diferensial və inklüziv təlimin təşkili, sinif idarəetməsi və təlimin səmərəliliyinin artırılması, süni intellektin təhsildə tətbiqi kimi aktual mövzular da təlim proqramının əsas istiqamətlərini təşkil edib.

Təlimlər həmçinin dərs planlaşdırma nümunələrinin hazırlanması və təqdimatı, dərsdinləmə fəaliyyəti və dinləmə sonrası rəyvermə, idarəetmə bacarıqları və pedaqoji liderlik kimi praktik və tətbiqyönlü fəaliyyətləri də əhatə edib. Təlim prosesində interaktiv müzakirələr, situativ tapşırıqlar və praktiki çalışmaların geniş şəkildə tətbiqi, iştirakçıların metodik və pedaqoji bacarıqlarının inkişafına, eləcə də bu bacarıqların real dərs mühitində səmərəli istifadəsinə şərait yaradıb. Müxtəlif bölgələrdən olan müəllimlərin fəal iştirakı və qarşılıqlı təcrübə mübadiləsi əsasında konstruktiv öyrənmə mühiti formalaşıb.

Qeyd edək ki, layihədə ibtidai sinif, Azərbaycan dili və ədəbiyyatı, Azərbaycan dili (dövlət dili), ingilis dili, fransız dili, alman dili, rus dili (xarici dil), rus dili və ədəbiyyatı, eləcə də riyaziyyat fənləri üzrə müəllimlərin sertifikasiyası imtahanından uğurla keçən pedaqoqlar iştirak ediblər.

“Müasir metodist” layihəsi üzrə metodist hazırlığı təlimlərinin davamı nəzərdə tutulur.