““Gənc qızların təhsilinə dəstək” layihənin ilk tərəfdaşı kimi bu təşəbbüsə qoşulmaq vacib və həlledici addımlardan biridir”. 

“Azərbaycan müəllimi” xəbər verir ki, bunu “Gənc qızların təhsilinə dəstək” layihəsinin iştirakçılarının “Məzun günü” ilə bağlı tədbirdə elm və təhsil naziri Emin Əmrullayev səsləndirib.  

Nazir vurğulayıb ki, qızların təhsilinə dəstək həm sosial ədalətin təmin olunması, həm də ölkənin gələcək inkişafına töhfə baxımından strateji əhəmiyyət daşıyır.

Emin Əmrullayev qeyd edib ki, Elm və Təhsil Nazirliyinin layihəyə verdiyi dəstək onun daha da genişlənməsinə və davamlılığının təmin olunmasına səbəb olub. Hazırda yüzlərlə tələbə qız bu layihədən faydalanır və həyatlarında yeni imkanlar əldə edir.  

Nazir onu da əlavə edib ki, tərəfdaşlıq əsasında aparılan işlər nəticəsində layihə yeni formatlarda da inkişaf etdirilib. 

O bildirib ki, bu təşəbbüslər bir daha sübut edir ki, qadınların təhsili və gücləndirilməsi cəmiyyətin hərtərəfli inkişafının əsasını təşkil edir.

E.Əmrullayev tədbirdə Heydər Əliyev Fondunun fəaliyyətinə də toxunub və fondun qızların təhsilinə verdiyi töhfəni xüsusi qeyd edib:

"Bu gün Leyla Əliyevanın tədbirimizdə iştirakından istifadə edərək Heydər Əliyev Fondunun bu istiqamətdəki fəaliyyətinə diqqət çəkmək istəyirəm. Qızların təhsilində göstərdikləri dəstəyə görə təşəkkür edirik".