Şimali Makedoniyanın paytaxtı Skopyedə keçirilən güləş üzrə U-17 Avropa çempionatında Azərbaycan üçün sevindirici hadisə baş verib. Lənkəranın Separadi kənd tam orta məktəbinin builki məzunu Ruslan Əlizadə 55 kq çəki dərəcəsində rəqiblərinə qalib gələrək Avropa çempionu olub. Gərgin keçən final görüşündə rusiyalı Maxaç Abdullayevi 3:2 hesabı ilə məğlub edən Ruslan fəxri kürsünün ən yüksək pilləsinə qalxıb.

“Azərbaycan müəllimi” olaraq oxucuları kənd məktəbinin məzunu olan bu gəncin nailiyyətləri ilə tanış etmək istədik.

Ruslanın idman hekayəsi 10 yaşında başlayıb. Ailəsində idmana maraq varmış. Belə ki, böyük qardaşı Seyhun Əlizadənin güləşlə məşğul olması onu da həvəsləndirib. 

“Qardaşım güləşə gedirdi, ona baxıb həvəslənib idmana başladım”, – deyə Ruslan özü bildirir. Onun sözlərinə görə, ilk dəfə yarışa çıxanda həyəcandan yerində dayana bilmirmiş. Uşaqlıqda qazandığı ilk qələbə və əldə etdiyi mükafatlar onda bu idmana qarşı daha da böyük maraq yaradıb. Bu maraq illər ərzində zəhmətə, nəticəyə və qürura çevrilib.

Avropa çempionatında isə yaddaqalan anlardan biri yarımfinal mərhələsində erməni rəqibinə qalib gəlməsi olub. Bu zəfər Ruslana final yolunu açıb və o, qarşısına çıxan heç bir çətinliyə boyun əymədən sona qədər mübarizə aparıb. Onun sözlərinə görə, qızıl medal ona çox qapılar açıb və növbəti yarışlara daha yüksək motivasiya ilə hazırlaşmağa ruhlandırıb. Hazırlıq prosesi isə heç də asan olmayıb. Həm fiziki, həm də psixoloji cəhətdən yorucu olan məşqlərdən sonra evə qayıdarkən “Əziyyətlərimiz yerdə qalmayacaq” deyərək qardaşı ilə bir-birinə mənəvi dəstək olublar.

Final döyüşündə taktiki baxımdan Ruslan çox düşünülmüş bir yol seçib. “Mən xal hesabı ilə öndə olduğuma görə o mənə hücum edəcəkdi. Mən isə müdafiədə onun səhvini gözləyirdim”, – deyə bu önəmli görüşü xatırlayır.

Uğur tək başına gəlmir. Ruslan da bunun fərqindədir. O, müəllim və məşqçilərini minnətdarlıqla anır: Baba Rzayev, Firuz Ələkbərov, Qədir Əliyev və Mais Məmmədov ona daim dəstək olublar. Məktəbində də ona hər zaman arxa duran müəllimləri olub, xüsusilə İslam Əliyevin adını çəkir və təşəkkürünü bildirir.
Rejimini sabit saxlayan Ruslan hər gün eyni nizamla yaşayır: səhər tezdən məşqə gedir, məşqdən sonra istirahət edir və rejimini pozmamağa çalışır. Onun sözlərinə görə, uğur qazanmaq istəyən hər bir gənc mütləq məqsədli, əzmkarlıqla çalışan və özünə inanan biri olmalıdır: “Məqsədi olan, əziyyət çəkən, özünə inanan həmişə uğur qazanır. Əziyyət çəkməsən, uğur qazana bilməzsən”.

İrəlidə onu yeni yarışlar gözləyir və o, bu yarışlara daha ciddi hazırlaşır. Hədəfi sadə deyil: daha yaxşı nəticələr göstərmək və ölkəmizi yenidən beynəlxalq arenalarda layiqincə təmsil etməkdir.

Ruslan Əlizadənin iradəsi, ailəsinin və müəllimlərinin dəstəyi, eləcə də zəhməti bu qızıl medala gedən yolu aydın şəkildə işıqlandırır. Şübhəsiz ki, daha böyük uğurları hələ qarşıda olan bu gənc idmançının uğur hekayəsi bir çoxlarına ilham verəcək.