Keçən ali təhsil müəssisələrinə qəbul imtahanlarında 9498 abituriyent 500-dən, o cümlədən 3076 abituriyent 600-dən yuxarı bal toplayıb. 

“Azərbaycan müəllimi” xəbər verir ki, bu, Dövlət İmtahan Mərkəzinin nəşr etdiyi 2024-2025-ci tədris ili üçün tələbə qəbulu və ümumi təhsil müəssisələri üzrə buraxılış imtahanlarının nəticələrinə dair elmi-statistik materialların əks olunduğu “Abituriyent 12” jurnalında qeyd olunub.

Hesabata görə, onların 39.01%-i (1200 nəfəri) I qrupun, 9.23%-i (284 nəfəri) II qrupun, 31.79%-i (978 nəfəri) III qrupun, 19.96%-i (614 nəfəri) IV qrupun abituriyentləridir. Yüksək bal toplayanlar respublikanın 73 bölgəsini təmsil edir. Onların nisbi sayına görə Şahbuz rayonunun, Sumqayıt şəhərinin, Qəbələ və Qax rayonlarının, Mingəçevir şəhərinin göstəriciləri daha yüksək olub. Bu bölgələrdən ali təhsil müəssisələrinə sənəd verən hər 100 nəfər gəncin müvafiq olaraq, 18-i, 16-17-si, 15-16-sı, 14-15-i, 14-ü imtahanlarda 500-dən yuxarı bal toplayıb. 500-700 arasında bal toplayan abituriyentlərin əksəriyyəti ən nüfuzlu ixtisaslara qəbul olub. Onlardan ən yüksək nəticə göstərən 102 nəfər Prezident təqaüdünə layiq görülüb.

Kənd rayonlarının məktəbləri arasında fərqlənən məktəblər kimi bu il İsmayıllı rayonu Diyallı kənd tam orta məktəbi, Qəbələ rayonu Nohurqışlaq kənd tam orta məktəbi və Ağstafa rayonu Həsənsu kənd tam orta məktəblərini göstərmək olar.