7-8 iyul 2025-ci il tarixlərində Təhsildə Keyfiyyət Təminatı Agentliyi (TKTA) tərəfindən bp Azərbaycan şirkətinin dəstəyi ilə “Sənətin varsa, Sənədin olacaq!” layihəsi çərçivəsində nəzəri və praktiki imtahan keçirilib.

Bu barədə “Azərbaycan müəllimi”nə agentlikdən məlumat verilib.

Bildirilib ki, “Qənnadıçı, şirniyyatçı” peşə ixtisası üzrə qeyri-formal və informal yollarla əldə edilmiş bilik, bacarıq, səriştə və təcrübələrin qiymətləndirilməsi istiqamətində nəzəri imtahanı uğurla keçən namizədlər növbəti gün “Honey Cake studio” MMC-nin istehsalat bazasında praktiki imtahan veriblər.  

TKTA-nın Hüquq təminatı departamentinin direktoru Vüqar Bağırlının sədrlik etdiyi Qiymətləndirmə Komissiyasının tərkibində Dövlət Məşğulluq Agentliyinin İdarə Heyəti sədrinin müşaviri Fuad Mehdizadə, işəgötürən tərəfin nümayəndəsi qismində “Honey Cake studio” MMC-nin  direktoru Gülnar Rəsulova və sahə üzrə müstəqil ekspert qismində təlimçi ekspert Kəminə Əsədova iştirak ediblər.

Adıçəkilən peşə ixtisası üzrə qeyri-formal və informal yollarla əldə edilmiş bilik, bacarıq, səriştə və təcrübələrin qiymətləndirilməsi istiqamətində nəzəri və praktiki imtahanlarda uğurlu nəticə əldə edən 15 namizəd “Qənnadıçı, şirniyyatçı” peşə ixtisası üzrə müvafiq sənədlə təltif olunublar.

Qeyd edək ki, sözügedən fəaliyyətin əsas məqsədi vətəndaşların əmək bazarında özünüməşğulluq imkanlarının artırılmasına və bu sahədə həyata keçirilən dövlət siyasətinə dəstək göstərməkdən ibarətdir.

Məlumat üçün bildiririk ki, agentlik tərəfindən təqdim edilən diplom və sertifikat Nazirlər Kabinetinin 5 avqust 2020-ci il tarixli 279 nömrəli Qərarına əsasən, sahibinə peşə ixtisasi üzrə əmək fəaliyyətinə başlamaq, eyni zamanda diplom ilk peşə təhsili səviyyəsində təhsil haqqında sənədə bərabər tutulur, peşə təhsili pilləsinin növbəti səviyyəsində təhsilini davam etdirmək hüququ verir.