2024-2025-ci tədris ilində ali məktəblərə qəbul zamanı Quba, Şamaxı, Şuşa, Abşeron, Xocalı, Bakı şəhərinin Xəzər, Qaradağ, Suraxanı və Sabunçu rayonlarında, eləcə də Mingəçevir şəhərində qızlar humanitar ixtisaslara daha çox üstünlük veriblər.

“Azərbaycan müəllimi” xəbər verir ki, bu, Dövlət İmtahan Mərkəzinin nəşr etdiyi 2024-2025-ci tədris ili üçün tələbə qəbulu və ümumi təhsil müəssisələri üzrə buraxılış imtahanlarının nəticələrinə dair elmi-statistik materialların əks olunduğu “Abituriyent 12” jurnalında qeyd olunub.

Hesabata görə,  Zaqatala, Salyan, Bakı şəhərinin Qaradağ, Qax, Neftçala, Qusar, Astara və Siyəzən rayonlarında oğlanlar yüksək faizlə (uyğun olaraq, 63.49%, 62.36%, 57.78%, 57.69%, 56.98%, 55.00%, 53.22% və 51.25%) texniki ixtisaslar qrupunu seçiblər: “Əvvəlki illərdəki qəbulun nəticələri də göstərir ki, bu bölgələrdə oğlanların texniki ixtisaslara maraqları yüksəkdir və bu, bir ənənəyə çevrilib. Buna səbəb həmin bölgələrdə dəqiq fənlərin, xüsusən riyaziyyat və fizika fənlərinin tədrisi səviyyəsinin yüksək olması, həmçinin texniki elmlərlə bağlılığı olan sənaye müəssisələrinin mövcudluğudur. Şübhəsiz, müəllimin nüfuzu, yüksək təhsili və pedaqoji bacarığı da şagirdlər arasında fənnin daha dərindən öyrənilməsini şərtləndirir. İxtisas seçərkən isə gənclər ən yaxşı bildikləri fənnin daha çox əhəmiyyət kəsb etdiyi ixtisas qrupuna üstünlük verirlər”.