“Təhsil elə bir sahədir ki, burada planlar kompleks və uzunmüddətli qurulmalı, dövlətin və cəmiyyətin ümumi inkişaf istiqamətləri ilə üst-üstə düşməlidir”.

Bu fikirləri AzNews.az xəbər portalının baş redaktoru Taleh Şahsuvarlı “Azərbaycan müəllimi”nə açıqlamasında bildirib. O qeyd edib ki, təhsil sistemində problemləri etiraf etmədən düzgün məqsədlər müəyyən etmək mümkün deyil: 

"Müstəqilliyin ilk illərində torpaqlarımızın işğalı həyatın bütün sahələrinə, o cümlədən elm və təhsilə də mənfi təsir göstərib. Bir çox məktəb və tələbə yataqxanalarında məcburi köçkünlərin məskunlaşması bunun bariz nümunəsidir. İndi isə tarixi zəfərin nəticələrini elm və təhsil müstəvisinə daşımalıyıq".

Baş redaktor hesab edir ki, ADA, UNEC, BANM, ADNSU, BDU və digər ali məktəblər artıq həm postsovet məkanında, həm də Şərqi Avropada bir çox universitetlərdən daha yüksək səviyyəli təhsil verir: "Bu brendlərin dünyaya təqdim olunması ilə ölkəyə çoxlu sayda əcnəbi tələbə cəlb etmək mümkündür. Necə ki, bir vaxtlar indiki ADNSU minlərlə xarici tələbəyə ev sahibliyi edirdi. Məqsədimiz o olmalıdır ki, gənclərimiz xaricdə oxumaq üçün ölkəni tərk etməsinlər, əksinə, biz xaricdən Azərbaycana "beyin" gətirək”, – deyə o bildirib.

T.Şahsuvarlı qeyd edir ki, universitetlərin mahiyyəti dəyişməli, onlar tələbəyə hər şeydən öncə öyrənməyi öyrətməli və tədqiqatları stimullaşdırmalıdır: "Süni intellekt və informasiya texnologiyalarının inkişafı cəmiyyətimizin qarşısına yeni şərtlər qoyur. Azərbaycan dilində məlumat bazası çox olmalıdır ki, süni intellekt bizim dilimizdə düşünə, yaza, danışa bilsin. Bu bazanın formalaşmasında tələbələrin potensialından istifadə etməliyik.

Ancaq sovet dövründən qalma prosedurlar, qəbul prosesinin süni çətinlikləri Azərbaycanda elmə marağı azaldır. DİM və test üsulu saxlanılmaqla, qəbul sistemimiz kökündən dəyişməldir. Tələbələr birdən çox universitetə qəbul olunmalı, son qərarında birini seçməlidirlər. 

İndi elə zamandır ki, praktik vərdişlər nəzəri bilikdən önə çıxıb. 350 baldan yuxarı nəticə göstərən hər bir məzun ən yüksək səviyyəli ixtisasları uğurla mənimsəyə bilər. Təhsil sisteminin əsas vəzifəsi isə istedadı aşkarlamaq, inkişaf etdirmək və doğru istiqamətə yönləndirməkdir".

Baş redaktor bildirib ki, repetitorluq Azərbaycanda elmə və təhsilə çox böyük problemlər yaradır: "Gənclər universiteti bitirir, repetitorlardan qurtula bilmirlər. Repetitorluq bazarını genişləndirən amilləri sıfırlamaq lazımdır".