Mingəçevir şagirdləri süni intellektin köməyi ilə LIDAR sensor qurğularını təkmilləşdiriblər və bunun nəticəsində səmadakı kənar müdaxilələri insan müdaxiləsi olmadan sürətli və dəqiq aşkarlayan sistem hazırlayıblar. Bu yanaşma sayəsində hər hansı hava hədəfi – dron, təyyarə, hətta silah və bomba insan müdaxiləsi olmadan müəyyən edilərək real vaxtda analiz olunur və buna qarşı tədbirlər avtomatik icra edilir. Sistem dron vasitəsilə keçirilən sınaqlarda da özünü doğruldub. Mingəçevir şəhəri İ.Qayıbov adına 10 nömrəli tam orta məktəbin “AI‑SKYS” komandası məhz bu yenilikçi texnologiyalarına görə “Sabahın alimləri” müsabiqəsində bürünc medal qazanıb.

“TensorFlow” və “YOLOv5” alqoritmlərinin birləşdirilməsi ilə formalaşan bu sistem 5G şəbəkəsinin yüksək ötürmə sürəti sayəsində müdafiə strategiyalarını anlıq olaraq tənzimləyir. 10-cu sinif şagirdi Mürsəl Musayev və 11‑ci sinif şagirdi Nailə Nəbiyeva qalib olduqları layihə ilə bağlı “Azərbaycan müəllimi”nə danışıb.

Mürsəl deyir ki, təkmilləşdirdikləri sistem kompüter proqramı vasitəsilə səmadan (dron, təyyarə, silah, bomba və s.) gələn potensial təhlükələri insan müdaxiləsi olmadan müəyyən edir: “LIDAR sensor qurğularını süni intellektin köməyi ilə təkmilləşdirərək sürətli və dəqiq aşkarlama sistemi hazırladıq. Bu proqram yalnız təhlükələri müəyyən etmir, eyni zamanda, real vaxt rejimində əldə olunan məlumatlara əsasən, onlara qarşı tədbir də həyata keçirə bilir”.

Nailə bildirir ki, 5G şəbəkəsi vasitəsilə məlumatların sürətli ötürülməsi müdafiə sisteminin çevikliyini artırır və vaxtında reaksiya verməyə imkan yaradır.

Məktəbin direktoru, eyni zamanda, layihənin elmi rəhbəri Yeganə Kərimova bu uğurun uzunmüddətli və məqsədyönlü hazırlıq işlərinin nəticəsi olduğunu vurğulayır:

“Mürsəl və Nailə layihə ideyasını formalaşdırdıqdan sonra LIDAR süni intellekt və 5G texnologiyaları ilə bağlı geniş araşdırmalar apardılar. Biz onların nəzəri biliklərini möhkəmləndirmək üçün həm məktəbdə, həm də Mingəçevir Dövlət Universiteti (MDU) ilə birgə müzakirələr təşkil etdik. Şagirdlərimizin bürünc medal qazanması birgə əməkdaşlığın və onların yenilikçi baxışlarının bariz nümunəsidir”.