“Orta məktəb illərində Armin Vamberinin kitablarını oxumuşam. Sehrli, nağıllarla dolu Şərqdə yaşamışam. İndi isə bu möhtəşəm Naxçıvanda olmaq həyatımın ən gözəl təcrübələrindən biridir. Mən burada xalqı, vətəni Azərbaycan üçün çalışan gözəl insanların arasındayam”.

“Azərbaycan müəllimi” xəbər verir ki, bu fikirləri Naxçıvan Dövlət Universitetində qonaq olan Macarıstan Milli Assambleyasının sədr müavini, dünyaşöhrətli siyasətçi Şandor Lejak jurnalistlərə müsahibəsində söyləyib.

O bildirib ki, Azərbaycanın inkişafının iki əsas sirri var.  Birincisi, xalqın ortaq uğur hissinə sahib olmasıdır. Uğur qazanmaq isə çox zəhmət tələb edir. İkincisi, ölkədə yüksək səviyyəli təhsil,  müasir tədris şəraiti və yaxşı məktəblərin olmasıdır.  Azərbaycanda təhsilin yaxşı olması imkan verir ki, ölkə daha da inkişaf etsin. Təcrübə mübadiləsi də bu baxımdan mühüm amildir: “Bu məqsədlə tələbələr Naxçıvana gəldilər, buradan olan tələbələr isə Macarıstana getdilər”.

Məşhur yazıçı bir xatirəsini də jurnalistlərlə bölüşüb: 

“Bir faktı əlavə etmək istəyirəm. Budapeştdən 120 kilometr aralıda - Lakitelektdə Nizami Gəncəvinin büstü var. Bir gün həmin yolun kənarı ilə gedərkən heykəlin yanında insanların oraya təbii güllər qoyduğunu gördüm. Öz-özümə düşündüm ki, görəsən bu gülləri niyə buraya gətiriblər? Sonradan məlum oldu ki, orada çalışanlar azərbaycanlılardır. Həmin adama dedim ki, əgər bunu kiməsə danışsam, inanmaz”.