İtaliyanın Siciliya adasının cənubunda, İspika yaxınlığındakı Santa Maria del Fokallo sularında eramızdan əvvəl 5-6-cı əsrlərə aid gəmi qalıqları və dəmir lövbərlər tapılıb.

"Azərbaycan müəllimi" xəbər verir ki, arxeoloqlar gəminin 6 metr qalınlığında qum və qaya təbəqəsi altında aşkar ediblər.

Tapıntılar arasında eramızın VII əsrinə aid olduğu ehtimal edilən iki dəmir lövbər və dörd daş lövbər də var. Onlardan biri qırılmış vəziyyətdə tapılıb və əvvəlcə dəniz dibinə bərkidilmək üçün taxta çubuqlarla təchiz olunduğu güman edilir.

Arxeoloqların sözlərinə görə, gəminin gövdəsi qədim dövrlərdə geniş yayılan "Shell-on-Shell" texnikası ilə tikilib. Bu üsul taxtaların bir-birinə birləşdirilməsi ilə gövdənin özünü dəstəkləyən struktur kimi fəaliyyət göstərməsini təmin edirdi.

Siciliyanın mədəni irs üzrə müşaviri Françesko Paolo Skarpinato bildirib ki, bu tapıntılar Siciliyanın antik dövrdə nəqliyyat və mədəni mübadilələrdəki mərkəzi rolunu təsdiqləyir. Professor Massimo Kapulli isə kəşfin qədim yunanlar və karfagenlilər arasında dəniz ticarəti barədə yeni məlumatlar əldə etməyə kömək edə biləcəyini vurğulayıb.

Tədqiqatçılar gəminin 3D modelini hazırlayıb, qalıqlardan nümunələr götürərək dövrün gəmiqayırma texnologiyaları barədə daha ətraflı məlumat öyrənməyi hədəfləyirlər. Bu sualtı kəşf 2017-ci ildən davam edən və Siciliyanın zəngin dəniz irsini araşdıran Kaukana layihəsinin bir hissəsidir.