Gəncə şəhər 26 nömrəli Fizika-riyaziyyat və informatika təmayüllü məktəb-liseyin şagirdi Nəzrin Abbasova tam (11 illik) orta təhsil səviyyəsi üzrə martın 9-da keçirilmiş buraxılış imtahanında maksimum bal toplayıb. 

“Azərbaycan müəllimi” qəzeti yüksək nəticə göstərən Nəzrinin təəssüratlarını öyrənib.

– Nəzrin, müəllimlərin sənin yüksək nəticə əldə edəcəyinə inanırdılar?

– Bəli, müəllimlərim 300 bal toplayacağıma tam əmin idilər. Onların bu inamı məni daha da ruhlandırırdı. Bu motivasiya ilə çalışmaq mənə əlavə güc verirdi.

– Hazırlaşma prosesində sənin üçün hansı amillər daha önəmli oldu: zəhmət, yoxsa planlama?

– Məncə, hər iki faktor vacibdir. Zəhmətsiz nəticə mümkün deyil. Amma vaxtını düzgün planlamasan, əziyyətin də səmərəsiz ola bilər. Mən gündə 6-7 saat dərs oxuyurdum. Ən çox diqqət yetirdiyim fənn isə çox sevdiyim riyaziyyat idi.

– Bu qədər oxumaq üçün insanın içində motivasiya olmalıdır. Səni nə motivasiya edirdi?

– Ən böyük motivasiyam məqsədim idi. Amma tək bununla kifayətlənmirdim, direktorumuz, müəllimlərim və ailəm mənim daim yanımda olublar. Onların dəstəyi hər zaman mənə ruh verirdi. Həmçinin uğurlu insanlarla söhbətlər, onların məsləhətləri də məni çox təsirləndirirdi.

– Dərs oxuma üsulun necə idi? Necə çalışırdın?

– Mütəmadi şəkildə testlər işləyirdim, qeyd aparırdım. Ən vacibi isə nəzəriyyəni tez-tez təkrar edirdim. Bu, biliklərimi möhkəmləndirirdi.

– Sosial şəbəkələr və digər yayındırıcı faktorlarla necə mübarizə aparırdın?

– Vaxtı düzgün bölmək çox vacibdir. Sosial şəbəkələrə çox vaxt ayırmamaq lazımdır. Mən ekran saatımı azaltmışdım. Gündəlik plan qurur, bu plana uyğun hərəkət edirdim.

– Gələcəkdə hansı ixtisası seçmək istəyirsən?

– İnformasiya texnologiyaları və ya informasiya təhlükəsizliyi üzrə təhsil almaq istəyirəm. Arzum isə bu sahə üzrə Nəqliyyat, Rabitə və Yüksək Texnologiyalar Nazirliyində çalışmaqdır.

– Bəs həmyaşlarına nə tövsiyə edərdin?

– Özünüzə inanın! Sağlam həyat tərzi sürün, düzgün qidalanın və intizamlı şəkildə dərslərinizə davamlı hazırlaşın!

– Sənin fikrincə, müasir şagird necə olmalıdır?

– Müasir şagird əzmli və iradəli olmalıdır. Daim öz üzərində çalışmalı, inkişafa açıq olmalıdır.

Nəzrinlə söhbətimizi bitirdikdə artıq onun uğurlu gələcəyini gözlərimiz qarşısında canlandıra bilirdik. Qarşıya məqsəd qoyan, ona doğru əzmlə irəliləyən bir gəncin uğur qazanacağına şübhə yoxdur. Uğurlar, Nəzrin!