“Həssas qrupların sosial müdafiəsinin təmini, sosial xidmətlər sisteminin əhatə dairəsinin genişləndirilməsi məqsədilə atılan mühüm addımlardan biri də Sosial Xidmət mərkəzlərinin yaradılması idi. Əvvəlcə Abşeronda yaradılan, daha sonra isə Sabunçu, Nərimanov və Yasamal rayonlarında fəaliyyətə başlayan bu Sosial Xidmət mərkəzlərində və Sumqayıt Sosial Xidmət Kabinetində uşaqlar üçün fərdi və qrup şəklində sosial-reabilitasiya xidmətləri təşkil edilir”. 

“Azərbaycan müəllimi” xəbər verir ki, bu fikirləri Sosial Xidmətlər Agentliyinin İdarə Heyətinin sədri Vüqar Behbudov qurumun yaradılmasının 5 illiyi münasibətilə keçirilən mətbuat konfransında səsləndirib.

O bildirib ki, həssas qrupa aid olan uşaqların valideynləri müvafiq təlimlərə cəlb olunurlar. Mərkəzlər uşaqlara keyfiyyətli reabilitasiya xidmətləri göstərilməsi üçün xüsusi avadanlıq və ləvazimatlarla təchiz edilib. 

Mərkəzlərdə ixtisaslı mütəxəssislər tərəfindən əlilliyi olan uşaqlarla bərabər, çətin həyat şəraitində olan şəxslərə (ailələrə) sosial-psixoloji yardım edilib. Sosial Xidmət mərkəzlərində ümumi olaraq 1353 nəfər qeydiyyata alınıb ki, onların 963 nəfərinə psixoloq, psixo-pedaqoq, loqoped və aktiv terapevt tərəfindən sosial-psixoloji, sosial-pedaqoji, loqopedik və aktiv terapiya xidmətləri göstərilib. Həmçinin ötən dövrdə 1203 nəfər sosial-məsləhət yardımı ilə təmin edilib. 

Hazırda bu mərkəzlərdə 260 uşağa aktiv xidmətlər göstərilir. Artıq agentliyin psixoloqları tərəfindən psixoloji dəstək alan 60-dan çox uşaqla bağlı müsbət nəticə əldə olunub, 50-dən çox ailə nazirliyin tabeliyindəki müvafiq qurumlara yönləndirilib və onların sosial problemlərinin həllinə dəstək göstərilib.

Xidmətlərdən faydalanmaq istəyənlər Sosial Xidmətlər Agentliyinə və onun regional filiallarına, eləcə də DOST mərkəzlərinə müraciət edə bilərlər.