5–6 iyul 2025-ci il tarixlərində Sənaye və İnnovasiyalar üzrə Bakı Dövlət Peşə Təhsil Mərkəzinin “WorldSkills Azerbaijan” İctimai Birliyi ilə əməkdaşlığı çərçivəsində keçirilən veb-texnologiyaları üzrə yerli yarış uğurla başa çatıb.

“Azərbaycan müəllimi” xəbər verir ki, yarışda bu sahədə bacarıqlı gənclər öz bilik və bacarıqlarını nümayiş etdirmək imkanı qazanıb. Ümumilikdə 11 iştirakçı yarışda öz gücünü sınayıb. Müsabiqə peşəkar mühitdə və beynəlxalq standartlara uyğun şəkildə təşkil olunub.

İştirakçılar real veb-layihələr üzrə tapşırıqları yerinə yetirərək dizayn, frontend və backend proqramlaşdırma, funksionallıq və istifadəçi təcrübəsi sahələrində qiymətləndiriliblər.

Yarış nəticələrinə əsasən Emil Hüseynov I yerə, David Məmmədov II yerə, Kərəm Səfərli III yerə layiq görülüb.

Qalib iştirakçı peşəkar bacarıqlarını daha da inkişaf etdirmək məqsədilə Çində keçiriləcək xüsusi təlim proqramında iştirak edəcək. Qalib şəxsin adı 2026-cı ildə Çində keçiriləcək və 85-dən çox ölkənin qatılacağı “WorldSkills Shanghai” yarışında iştirak üçün potensial namizədlər siyahısına daxil ediləcək.

Dünyada müxtəlif bacarıq istiqamətləri üzrə olimpiadaların təşkilatçısı kimi tanınan “WorldSkills” hərəkatı iştirakçıların peşə bacarıqlarını nümayiş etdirmələrinə imkan yaradan yarış formatıdır və bununla yanaşı, qlobal standartların və əmək bazarının tələblərinin təhsil sisteminə inteqrasiyasını təşviq edir.