Düz 33 ildən sonra ilk dəfə Xocalı şəhər 1 nömrəli tam orta məktəbdə “Son zəng” çalınıb. Tədbir Azərbaycanın Dövlət Himninin səsləndirilməsi ilə başlayıb. Sonra şəhidlərimizin xatirəsi bir dəqiqəlik sükutla yad edilib.  

Yeni tədris ilinə 33 şagirdlə başlayan bu təhsil ocağında təhsilalanların sayı artıq 102 nəfərə çatıb. Amma bu rəqəm hələ son deyil. Xocalıya mərhələ-mərhələ köçürülən ailələrdəki uşaqların sayına görə bu rəqəm daha da artacaq. 

 “Son zəng”ə qatılan şagirdlərin, müəllimlərin, hər kəsin üzündə təbəssüm var idi, bu tarixi gün məzunların yaddaşından heç vaxt silinməyəcək izlər buraxacaq. Axı onlar doğma Xocalımızda ilk məzun oldular.

Məktəbin direktoru Nəvai Həsənov qonaqları salamlayaraq valideynlərə gözaydınlığı verib. N.Həsənov çıxışında qəhrəman oğullarımızın  şücayəti və qərəmanlığı sayəsində Vətən torpaqlarının düşmən əsarətindən azad olunduğunu, ərazi bütövlüyümüzün və suverenliyimizin bərpası uğrunda neçə- neçə oğullarımızın şəhidlik zirvəsinə yüksəldiyini bildirib. Məzunlara üz tutan məktəbin direktoru əlavə edib: “Onların ruhunu şad etmək üçün siz layiqli vətəndaş olmağı bacarmalısınız. Uzun illərdir tarixə adını yazan Xocalı 1 nömrəli tam orta məktəbin məzunları təkcə ölkə daxilində deyil, xarici ölkələrdə də təhsil alaraq başımızı uca ediblər. Azərbaycanın aparıcı univeristetlərində çalışan məzunlarımızla da fəxr edirik. Bu məktəb tarixi bir yol keçib, görkəmli alimlər, həbiçilər yetişdirib”.    

Sonra Qarabağ Regional Təhsil İdarəsi tərəfindən keçirilən imtahanda yüksək nəticə göstərmiş Xocalı şəhər 1 nömrəli tam orta məktəbin IV sinif şagirdi  Ayan Ələsgərli, VI sinif şagirdi  İnci Əzizova Fəxri fərmanlar təqdim olunub. Məktəbin müəllimləri çıxış edərək məzunlara müstəqil həyat yolunda uğurlar diləyiblər. 

Əməkdar müəllim Tamella Bilalova məzunları ölkəmizn müasir tarixində qəhrəmanlıq salnaməsini yazan şəhidlərimizin adına layiq olmalarını tövsiyə edərək bildirib ki, Ali Baş Komandan İlham Əliyevin müdrik siyasəti sayəsində Müzəffər Ordumuz II Qarabağ müharibəsində qəhrəmanlıq tarixi yazıb, bizi  Xocalıya qovuşdurub. “Son zəng”in müstəqil həyata ilk addım olduğunu deyən Əməkdar müəllim məzunlara öz arzularını çatdırıb. 

Xocalı Rayon İcra Hakimiyyəti başçısı Aparatının Yetkinlik Yaşına Çatmayanların işləri və Hüquqlarının müdafiəsi üzrə komissiyanın məsul katibi  Xəlil Vəliyev bu məktəbin məzunu olması ilə fəxr etdiyini və qürur hissi keçirdiyini, Xocalıya ilk köçən ailələrdən birinin də öz ailəsi olduğunu deyib. “Biz bu tarixi günə şahidlik edirik. Artıq bu xəyal deyil, bir gerçəklikdir. 2024-cü il sentyabrın 16-da elm və təhsil naziri Emin Əmrullayevin, nazirliyin  əməkdaşlarının məktəbimizin açılışında olması bizi fərəhləndirdi. İnanıram ki, bizim məktəbimizdə şagirdlərin sayı artacaq, daha çox məzunları müstəqil həyata  yola salacağıq”. 

Məktəbin tədris hissə müdri Aydın Həsənov və təlim tərbiyə işləri üzrə müavin Nazilə Məmişova da öz ürək sözlərini söylərək məzunlara uğurlar arzulayıblar.

“Son zəng” günün mübarək Xocalı məktəbi...