“Ədəbiyyat fənn kurikulumunun təkmilləşdirilməsi zamanı ilk olaraq mövcud sənədləri analiz etdik. Hazırladığımız yeni tədris proqramında təhlil bacarıqlarını önə çıxarmağa, şagirdlərdə ədəbi bacarıqları inkişaf etdirən metodları qabartmağa çalışmışıq”.

“Azərbaycan müəllimi” xəbər verir ki, bunu Təhsil İnstitutunun Ədəbiyyat fənn kurikulumu üzrə işçi qrupunun üzvü Vüsalə Nəbisoy bir neçə gün öncə “Ədəbiyyat fənninin məzmununda yeniliklər” mövzusunda keçirilən vebinarda deyib.

O bildirib ki, təhlil zamanı ortaya çıxdı ki, mövcud kurikulumun məzmun əhatəliliyi beynəlxalq kurikulumlarla müqayisədə normaldır: “Lakin mövzularda təkminləşdirməyə, yenidən işlənməyə ehtiyac var. Mövcud proqramda ümumiləşdirmə güclü, konkretlik zəifdir. Beynəlxalq təcrübədə publisistik mətnlər fann kurikulumunda əksini tapıb, lakin hazırda tədrisdə istifadə edilən proqramda yoxdur”.

Ədəbiyyat fənn kurikulumu üzrə işçi qrupunun üzvü təkmilləşdirilən proqramdakı yeniliklər ilə bağlı məlumat verərək əlavə edib ki, yeni ədəbiyyat kurikulum sənədində məzmun xətləri və standartlar tamamilə dəyişdirilib:

“Yeni tədris proqramına ədəbi növlərlə bərabər publisistik və məlumatlandırıcı mətnlər də daxil edilib. Bədii publilistik nümunələrə istinad edilib. Ünsiyyətin vacibliyi nəzərə alınaraq bu mövzu 2-ci məzmun xəttinə əlavə edilib. O da öz növbəsində şifahi nitq və ünsiyyət bacarıqları, yazılı nitq Standartlarına bölünür. Standartlar sinifdən-sinfə davam edir, dərinləşmə gedir, inkişaf etdirilir. Yazılı nitqdə bədii-nümunələrin hazırlanması geniş seçimdə əks olunur”.