"İqlim dəyişikliyinə dair təsirləri görünən, ölçülə bilən və hiss edilə bilən etmək çox vacib bir addımdır ki, bu istiqamətdə müsbət nəticələri görə bilək. İkinci addım isə bunu məktəb proqramlarımıza daxil etməkdir. Məsələn, iqlim savadlılığını tədris edərkən insanlara fakt ilə rəy arasında fərqi ayırd etməyi, qeyri-müəyyənliklər içində düzgün istiqamət tapmağı aşılaya bilərik. Riyaziyyat tədris edərkən isə eksponensial funksiyaların necə işlədiyini öyrədə bilərik ki, bu da iqlim dəyişikliyini və təkamülü daha yaxşı başa düşməyimizə kömək edir".

Bu fikirləri "Azərbaycan müəllimi" və Təhsil TV-yə açıqlamasında İqtisadi Əməkdaşlıq və İnkişaf Təşkilatının (OECD) Təhsil və bacarıqlar üzrə direktoru, PISA-nın yaradıcısı Andreas Şleyxer deyib.

O qeyd edib ki, biz ölkələr olaraq elmi öyrədərkən gənclərə "yaşıl mühəndis" və ya "yaşıl sahibkar" olmağın yollarını göstərə bilərik. Bu, gələcəyimizi həm iqlim uyğunlaşması, həm də iqlim dəyişikliklərinə qarşı tədbirlər baxımından dəyişdirəcək. Ən əsası isə müəllimləri bu bacarıqlarla təmin etməkdir ki, onlar tələbələrə, şagirdlərə gələcəyin yaşıl mühəndisləri olmağa kömək edə bilsinlər. İqlim savadlılığını ölçmək çox vacibdir, çünki görə bilmədiyimizi inkişaf etdirə bilmərik.

"Bu ilk addımı atmaq üçün PISA ideal bir fürsət təqdim edir. PISA qlobal təhsil göstəricilərini ölçən beynəlxalq tədqiqatdır.

Artıq onlarla ölkə bu proqrama qoşulub. Buna görə də, düşünürəm ki, PISA yalnız riyaziyyat, elm və oxu üzrə ölçmələrlə məhdudlaşmamalı, iqlim savadlılığını da özündə əks etdirməlidir", - deyə A.Şleyxer açıqlama verib.