2-9 dekabr 2024-cü il tarixlərində Azərbaycanda “Bebras” həftəsi keçiriləcək.

“Aərbaycan müəllimi” xəbər verir ki , "Bebras" İnformatika və Alqoritmik Düşüncə Yarışması şagirdlərin alqoritmik və hesablama təfəkkürlərini inkişaf etdirmək məqsədilə təşkil olunur və proqramlaşdırma bilikləri tələb etmədən informatika üzrə tapşırıqları həll etməyə yönəlib. 

Müsabiqə onlayn rejimdə baş tutur. Bu da ölkənin istənilən nöqtəsindən şagirdlərin iştirakını asanlaşdırır və logistika baxımından əlverişlidir. Şagirdlər 40 dəqiqə ərzində öz yaş qruplarına uyğun müxtəlif tapşırıqları həll edirlər. Bu tapşırıqlar şagirdlərin analitik düşünmə, məntiqi əlaqələri qurma və problem həll etmə bacarıqlarını inkişaf etdirir.

İnformatika və rəqəmsal inkişafın təbliğini məqsəd qoyan bu tədbir “İnnovasiyalar və Rəqəmsal İnkişaf Agentliyi” və “Təhsil İnstitutu”nun təşkilati dəstəyi ilə keçirilir. Yarışmanın rəsmi təşkilatçısı Azərbaycanda "Bebras" müsabiqəsinin rəsmi nümayəndəsi ÖzünÖyrən MMC-dir.

“Bebras” Həftəsi bu il daha geniş iştirakçı kütləsi ilə ölkə üzrə böyük marağa səbəb olmuşdur. Hazırda Azərbaycanın müxtəlif bölgələrindən, o cümlədən azad edilmiş Qarabağ ərazisi də daxil olmaqla 1000-dən çox məktəb iştirak üçün qeydiyyatdan keçib. Müsabiqə, 1-ci sinifdən 10-cu sinfədək bütün şagirdlər üçün açıqdır.

Qeyd edək ki, Beynəlxalq "Bebras" İnformatika və Alqoritmik Düşüncə Yarışması ilk dəfə 2004-cü ildə Litvada keçirilib. Yarışmanın məqsədi şagirdlər arasında informatika və kompüter elmlərinə marağı artırmaqdır. Hazırda ABŞ, Almaniya, Fransa, Yaponiya, Türkiyə və başqa ölkələr də daxil olmaqla 70-dən çox ölkədə bu müsabiqə keçirilir yüz minlərlə şagird iştirak edir.

Azərbaycanda isə "Bebras" müsabiqəsi 2014-cü ildən keçirilir. 2023-cü ildə 61 rayon və şəhərdən 242 məktəbi əhatə etmiş və 5395 şagird iştirak etmişdir. Ən yüksək bal toplamış şagirdlər 2024-cü ilin aprel ayında final mərhələsində qaliblər “İnnovasiyalar və Rəqəmsal İnkişaf Agentliyi” tərəfindən qiymətli hədiyyərlə təltif edilmişdilər. 

Müsabiqə haqqında daha ətraflı məlumat və qeydiyyatdan keçmək üçün http://bebras.az veb-saytından yararlana bilərlər