Bakının Sabunçu rayonunda yerləşən 310 nömrəli körpələr evi-uşaq bağçasında istiliyin verilməsinə problem var. Bu məsələ ilə bağlı “Azərbaycan müəllimi”nə müraciət edən valideyn bildirib ki, bağçada belə vəziyyət uzun müddətdir davam edir. 

Problemi araşdırmaq üçün körpələr evi-uşaq bağçasının direktoru Rufanə Hüseynzadə ilə əlaqə saxlamaq istəsək də, o, "Mən bu suala cavab verə bilmərəm” deyərək məsələyə aydınlıq gətirməkdən imtina edib. 

Bakı şəhər üzrə Təhsil İdarəsi bağçada hazırda belə bir problemin olduğunu təsdiqləyib. İdarədən “Azərbaycan müəllimi”nin sorğusuna cavab olaraq bildirilib ki, 310 nömrəli körpələr evi-uşaq bağçasını istiliklə təmin edən qazanxananın qaz sayğacı dövlət yoxlamasından keçirilmək üçün müvafiq mütəxəssislər tərəfindən çıxarılıb: “Hazırda istilik təminatı müvəqqəti olaraq elektrik qızdırıcıları vasitəsilə həyata keçiirlir. Məsələnin qısa zamanda həlli məqsədilə zəruri tədbirlər görülür”.

“Azəriqaz” İstehsalat Birliyinin İctimaiyyətlə əlaqələr şöbəsinin rəisi Eldəniz Vəliyev faktı təsdiqləyərək bildirib ki, təhsil müəssisələrindəki sayğaclar bu ilin may ayından çıxarılıb: “Sayğacların yararlı və ya yararsız olması barədə müəssisələrə məlumat verilib. Həmin müəssisələr yeni sayğacla təmin olunma üçün  Elm və Təhsil Nazirliyinə müraciət etməli idi. Bildiyimizə görə, podratçı təşkilat bununla məşğuldur”.

E.Vəliyev əlavə edib ki, “Azəriqaza”a müvafiq sənədlərlə müraciət edənlərin sayğacla təmini üçün artıq işlərə başlanılıb: “Müraciət edənlər üçün sayğac ayıraraq ünvanlarda quraşdırmışıq. Digərlərinin hər hansı sənədi yoxdur”.

Elm və Təhsil Nazirliyi ilə “Azəriqaz” İB-nin rəhbərliyi arasında danışıqların aparıldığını vurğulayan E.Vəliyev yeni sayğac üçün müraciət edənlərin qaz təminatının metodik hesabatla bərpa olunmasına dair tapşırığın verildiyini söyləyib. Onun sözlərinə görə, ümumilikdə 50 təhsil müəssisəsi ilə protokol bağlanılıb və onların qaz təminatı bərpa olunub: “Müəssisələrin böyük əksəriyyəti ilə müvafiq sənədlər imzalanıb. 50 müəssisə tərəfimizdən nəzarətə götürülüb və işlərin 90 faizi artıq icra olunub. Bəzi məktəb və bağçalar isə bununla bağlı hələ müraciət etməyib. Onların müraciəti olmalıdır ki, hesabatın forması müəyyənləşdirilsin, çünki ödənişi Bakı şəhəri üzrə Təhsil İdarəsi ayırmalıdır”.

Xatırladaq ki, Məktəbəqədər və Ümumi Təhsil üzrə Dövlət Agentliyi 2 gün əvvəl yaydığı məlumatda gündəlik əsasda yarana biləcək istilik təminatına dair məsələlərlə bağlı digər aidiyyəti qurumlarla birlikdə operativ işçi qrupları yaradıldığını açıqlayıb: "Daxil olan müraciətlər qeydiyyata alınır, təhlillər aparılır və qısa zamanda həlli istiqamətində müvafiq addımlar atılır. Ölkə ərazisində fəaliyyət göstərən ümumi və məktəbəqədər təhsil müəssisələrinin mərkəzləşdirilmiş qaydada və müxtəlif vasitələrlə (odun, dizel, elektrik radiatoru) istilik mövsümünə hazır vəziyyətə gətirilməsi prosesi təmin olunur”.