Təhsil İnstitutu və İnnovasiya və Rəqəmsal İnkişaf Agentliyinin birgə əməkdaşlığı çərçivəsində Lənkəran şəhərində VII sinif şagirdləri üçün xüsusi hazırlıq dərsləri keçirilir. 

"Azərbaycan müəllimi" xəbər verir ki, layihə çərçivəsində riyaziyyat və informatika fənləri üzrə VII sinif şagirdlərinə 4 ay ərzində xüsusi hazırlıq dərsləri keçiriləcək. Qruplara şagird seçimi müvafiq imtahan nəticəsinə görə aparılıb. İmtahan nəticəsində riyaziyyat və informatika fənlərinin hər biri üzrə 60 nəfər şagird seçilib. Şagirdlər topladıqları ballara əsasən A, B və C qruplarına ayrılıb. Hər iki fənn üzrə ümumilikdə 6 qrupda 120 şagird hazırlıq keçir.

Bütün qruplar paralel olaraq ingilis dili üzrə sürətləndirilmiş dərslər keçirlər. İngilis dili məşğələlərinin məqsədi şagirdlərin ingilis dili üzrə biliklərini artırmaq, ilkin danışıq bacarıqlarını formalaşdırmaqdır.

Şagirdlərin qeyri-dərs saatlarında peşəkar müəllimlər tərəfindən xüsusi proqramlar əsasında riyaziyyat və ingilis dili fənləri üzrə məşğələlər əyani, informatika fənni üzrə məşğələlər isə distant formada həyata keçirilir. Məşğələlər Lənkəran şəhər Azər Məhərrəmov adına 7 nömrəli tam orta məktəbdə təşkil olunur.

Layihənin məqsədi şagirdlərin riyazi bilik və bacarıqlarını inkişaf etdirmək, alqoritmik düşüncə tərzinin formalaşdırılmasına dəstək olmaq və kodlaşdırma qabiliyyətlərinin praktiki tətbiqinə şərait yaratmaq, eləcə də müvafiq sahələr üzrə milli, beynəlxalq fənn və layihə olimpiadaları, müsabiqələr, yarışlar haqqında ətraflı məlumat vermək və iştiraklarını təmin etməkdir.

Xüsusi proqram əsasında 24 nəfər riyaziyyat və 24 nəfər informatika müəllimlərinə də təlimlər keçirilib. Bu təlimlər təhsilverənlərin olimpiadalara hazırlıq təcrübəsini formalaşdıracaq.