“2026-cı ilin sentyabr-oktyabr aylarına qədər ölkə üzrə məktəbəqədər təhsildə əlavə 100 min yer açılacaq”.

“Azərbaycan müəllimi” xəbər verir ki, bunu elm və təhsil naziri Emin Əmrullayev bu gün keçirilən “Məktəbəqədər təhsildə keyfiyyətə yeni baxış” adlı II beynəlxalq konfransda çıxışı zamanı deyib. 

O bildirib ki, əgər pilot layihələr uğurlu olarsa, həmin yerlərin sayını artırmaq daha asan olacaq. Çünki artıq müəyyən bir model var və bu model sınaqdan keçib uğurlu nəticə göstərdikdə onun genişləndirilməsi daha rahat başa gələcək:

‘Bununla yanaşı, işğaldan azad olunmuş ərazilərdə yeni inşa edilən məktəbəqədər təhsil müəssisələri də bu rəqəmlərin artmasına töhfə verəcək”.

Nazirin sözlərinə görə, məktəbəqədər təhsildə keyfiyyət baxımından ən vacib məsələ sahə üzrə mütəxəssislərin hazırlanmasıdır:

“İlk dəfə olaraq biz məktəbəqədər təhsil mütəxəssislərinin diaqnostikasını həyata keçirmişik. Təhsil sahəsində bu cür yanaşmalar əvvəllər də tətbiq edilib. 2014-2015-ci illərdən başlayaraq, təhsildə diaqnostika və sertifikasiya prosesləri həyata keçirilib. Oxşar yanaşma məktəbəqədər təhsil sahəsinə də tətbiq olunacaq. Artıq diaqnostika prosesini tamamlamışıq. Hazırda mövcud məlumatlar əsasında mütəxəssislər üçün təlim modelləri hazırlayırıq ki, onlara müvafiq təlimlər keçək. Yaxın 1-2 ildə, yəni 2026-cı ilə qədər məktəbəqədər təhsil sahəsində sertifikasiya prosesinin tətbiqinə başlanılması planlaşdırılır”. 

Emin Əmrullayev xatırladıb ki, bu prosesin əməkhaqqı sisteminə də müəyyən təsir göstərəcəyi gözlənilir: “Hazırda bununla bağlı konkret qaydalar olmasa da, gələcəkdə oxşar məntiqin məktəbəqədər təhsildə də tətbiq ediləcəyini düşünürük”.