“Müəllim” nəşriyyatı tərəfindən Əməkdar müəllim, pedaqogika üzrə fəlsəfə doktoru Vaqif Mahmudov, Əməkdar müəllim Qalib Bəşirov, Sevinc Məmmədəliyeva, Xəqani Vahabov və Həsən Mahmudovun müəllifliyi ilə “Praktik riyaziyyat” adlı səkkiz bölmədən ibarət müəllim, tələbə və şagirdlər üçün nəzərdə tutulmuş 368 səhifəlik yeni metodik vəsait nəşr olunub.

“Azərbaycan müəllimi” xəbər verir ki, vəsaitdə istehsalat və məişət məzmunlu tarixi, əyləncəli və situasiya məsələləri, onların həlləri və cavabları, o cümlədən orta məktəbin bütün sinifləri üzrə riyaziyyat kursunda tətbiq olunan bir sıra maraqlı məlumatlar, kombinatorika elementləri, müxtəlif həndəsi qurmalar, say sistemləri, həmçinin hesablama riyaziyyatı, proqramlaşdırma dilləri və tam orta məktəblərin informatika kursunda tədris olunan Python proqramlaşdırma dili haqqında da dəyərli məlumat verilib. Vəsaitin son bölməsində maraqlı və məntiqi testlər, onların cavabları yerləşdirilib.

Şagirdlərin riyazi biliyinin keyfiyyətini yaxşılaşdırmaq məqsədilə, hər şeydən əvvəl, fənnin tədrisi yollarını müəyyənləşdirmək və mövzudan asılı olaraq rəngarəng vasitələrdən istifadə etmək lazım gəlir. Məktəbdə şagirdlərin riyazi qabiliyyətlərinin inkişafında digər pedaqoji tədbirlərlə yanaşı, riyaziyyat dərnəkləri də mühüm rol oynayır.

Bu məqsədlə kitabdan riyaziyyat dərnəklərinin işinin daha da yaxşılaşdırılması məqsədi üçün də istifadə edilə bilər.

Metodik vəsait ibtidai sinif, riyaziyyat və informatika müəllimlərinə, riyaziyyata xüsusi həvəs göstərən şagirdlərə, həmçinin müstəqil məsələ həll etmək bacarığına yiyələnmək istəyənlərə köməklik məqsədi ilə hazırlanıb. Kitabdan tam orta, pedaqoji, digər ali və orta ixtisas məktəblərinin, liseylərin, gimnaziyaların, kolleclərin, universitetlərin şagird, tələbə və müəllimləri də istifadə edə bilər.