Qarabağ Regional Təhsil İdarəsinin tabeliyində olan  Ağcabədi rayon Qaraş Əliyev adına Hindarx qəsəbə 3 nömrəli ümumi orta və Ağdam rayon Rzalar kənd tam orta məktəblərinin tikintidən sonra açılışı olub. 

“Azərbaycan müəllimi” xəbər verir ki, açılış tədbirində müvafiq rayonların icra hakimiyyətlərinin rəhbərləri, rayonlar üzrə təhsil sektorlarının müdirləri, şəhid ailə üzvləri, müəllimlər və şagirdlər iştirak ediblər. 

 Ağcabədi rayon Qaraş Əliyev adına Hindarx qəsəbə 3 nömrəli ümumi orta ümumtəhsil məktəb binası 528 şagird yerlik, üçmərtəbəli bir korpusdan ibarətdir. Təhsil müəssiəsində 22 sinif otağı, fizika, kimya, biologiya laboratoriyaları, informatika, hərbi hazırlıq, əmək təlimi otaqları, kitabxana, yeməkxana, 300 yerlik akt, idman zalları, açıq idman meydançası və köməkçi tikililər var. Məktəbdə 445 nəfər şagird təhsil alır, onların tədrisi ilə 42 nəfər pedaqoji heyət məşğul olur. 

 Ağdam rayon Rzalar kənd tam orta ümumi təhsil məktəbinin binası 184 yerlikdir. Təhsil müəssisəsində 14 sinif otağı, fizika, kimya, biologiya laboratoriyaları, informatika, hərbi hazırlıq, texnologiya otaqları, kitabxana, yeməkxana, 70 yerlik akt, idman zalları, açıq idman meydançası və köməkçi tikililər var. 126 şagird təhsil alır, onların tədrisi ilə 30 nəfər pedaqoji heyət məşğul olur.