Bu gün Şirvan şəhərində əsaslı təmir olunmuş Tahir Bağırov adına 11 nömrəli, eləcə də Biləsuvar rayonunda yeni tikilmiş Rafiq Rzayev adına Nəsimi kənd tam orta ümumtəhsil məktəblərinin açılış mərasimi keçirilib.

“Azərbaycan müəllimi”  xəbər verir ki, Şirvan şəhərində keçirilən mərasimdə Şirvan Şəhər İcra Hakimiyyətinin başçısı İlqar Abbasov, Şirvan-Salyan Regional Təhsil İdarəsinin müdiri Rəşad Musayev, Şirvan şəhəri üzrə təhsil sektorunun müdiri, müəllimlər və digər qonaqlar iştirak ediblər.

Köhnə binada aparılmış əsaslı təmir nəticəsində 1176 şagird yerlik məktəbdə müasir sinif otaqları, fənn kabinetləri, müəllimlər otağı, kitabxana, kompüter otağı, laboratoriyalar, akt və idman zalı, yeməkxana istifadəyə verilib.

Biləsuvar rayonunda keçirilən açılış mərasimində isə Biləsuvar Rayon İcra Hakimiyyətinin başçısı Faiq Qürbətov, millət vəkili Bəhruz Məhərrəmov, Şirvan-Salyan Regional Təhsil İdarəsinin İnzibati təşkilat sektorunun müdiri Müşfiq Dadaşov, Biləsuvar rayonu üzrə təhsil sektorunun müdiri, müəllimlər və digər qonaqlar iştirak ediblər. 624 şagird yerlik yeni məktəbdə yaradılan şəraitlə tanış olan tədbir iştirakçıları müasir və işıqlı sinif otaqlarında təlim-tədrisin yüksək səviyyədə təşkil olunacağını bildiriblər.

Mərasim iştirakçıları ölkədə təhsilin inkişafına göstərilən daimi qayğı və diqqətə görə Prezident İlham Əliyevə və Birinci vitse-prezident Mehriban Əliyevaya minnətdarlıqlarını ifadə ediblər.

Qeyd edək ki, 2025-2026-cı tədris ilində Şirvan şəhəri Tahir Bağırov adına 11 nömrəli tam orta ümumtəhsil məktəbində 90, Biləsuvar rayonu Rafiq Rzayev adına Nəsimi kənd tam orta ümumtəhsil məktəbində isə 50 nəfər şagird birinci sinifdə təhsil alacaq.