Azərbaycan Turizm və Menecment Universitetində (ATMU) Rumıniyanın Aleksandr İon Kuza adına Yassı Universitetinin nümayəndələri ilə görüş keçirilib. Tədbirdə ATMU-nun rektoru İlham Mədətov iştirak edib və qonaqları salamlayaraq bu əməkdaşlığın hər iki universitet üçün önəmini vurğulayıb.

Bu barədə “Azərbayan müəllimi”nə universitetdən məlumat verilib. Bildirilib ki, iki istiqamətdə təşkil olunan görüşün birinci hissəsi ATMU-nun Tədris işləri üzrə prorektoru Zaur Bağırovun rəhbərliyi ilə Turizm və qonaqpərvərlik fakültəsi və Biznes idarəçiliyi fakültəsinin dekanlarının iştirakı ilə keçirilib. Görüş zamanı universitetin tədris prosesinin təşkilatı, fakültələrdə mövcud təhsil proqramları və kadr hazırlığı üzrə əməkdaşlıq imkanları geniş müzakirə olunub. Həmçinin ATMU-nun Elm məsələləri üzrə prorektoru İranə Əliyeva ilə fikir mübadiləsi aparılaraq birgə elmi layihələrin həyata keçirilməsi, ortaq tədqiqat qruplarının yaradılması və elmi məqalələrin hazırlanması məsələləri diqqət mərkəzində olub.

Görüşdə Yassı Universitetinin nümayəndə heyətinə professorlar Ludmila Bejenaru (Ədəbiyyat Fakültəsi), Alexandra Chiriac (Ədəbiyyat Fakültəsi), Alexandru Maxim (İqtisadiyyat və Biznes İdarəçiliyi Fakültəsi), Mihai Bulai (Coğrafiya və Geologiya Fakültəsi) və Claudiu Costin (Fizika Fakültəsi) daxil idi. 2017-ci ildən etibarən müxtəlif istiqamətlər üzrə əməkdaşlıq edilən tərəfdaş universitet ilə beynəlxalq əlaqələr çərçivəsində imkanların daha da genişləndirilməsi istiqamətində Beynəlxalq əlaqələr şöbəsinin müdiri Orxan Musa və mütəxəssisi İranə Axundova fikir mübadiləsi aparıblar. Qonaqlarla beynəlxalq əməkdaşlıq, tələbə və müəllim mübadiləsi, birgə təhsil proqramlarının işlənib hazırlanması və akademik şəbəkələrin inkişafı istiqamətində danışıqlar aparılıb. Görüş zamanı iki ali təhsil müəssisəsi arasında mövcud və potensial əməkdaşlıq istiqamətləri ətraflı müzakirə olunub.

Görüşün ikinci hissəsində isə Turizm və qonaqpərvərlik fakültəsi və Biznes idarəçiliyi fakültəsinin tələbələri üçün infosessiya təşkil edilib. Tədbir zamanı Yassı Universitetinin nümayəndələri tələbələrə bakalavriat, magistratura və doktorantura səviyyələrində təhsil imkanları, beynəlxalq təcrübənin əhəmiyyəti və tədris proqramlarının oxşarlığı haqqında məlumat verib. Tələbələr onları maraqlandıran sualları ünvanlayaraq, gələcəkdə əməkdaşlıq imkanları barədə fikir mübadiləsi aparıblar.

Bu görüş Azərbaycan Turizm və Menecment Universiteti ilə Yassı Universiteti arasında mövcud əlaqələrin gücləndirilməsi və yeni əməkdaşlıq istiqamətlərinin müəyyən olunması baxımından mühüm addım kimi qiymətləndirilir.