Hər bir uğurun arxasında böyük zəhmət dayanır. Builki abituriyentlər bunu bir daha sübut etdilər. Bu həm müəllimlərin fədakar əməyinin, həm də şagirdlərin ciddi hazırlığının bəhrəsidir. Belə ki, 6-sı paytaxt məktəblisi olmaqla, respublika üzrə ümumilikdə 20 nəfər martın 9-da keçirilən buraxılış imtahanında maksimum nəticə göstərib. 

89 nömrəli tam orta məktəbin istedadlı və çalışqan şagirdi Aişə Bağırova 300 bal topladığını öyrəndiyi anı həyatının ən unudulmaz xatirəsi kimi yadda saxlayır. 

O, “Azərbaycan müəllimi”nə bu uğurun təsadüfi olmadığını, illərin zəhmətinin və müəllimlərinin sonsuz dəstəyinin bir nəticəsi olduğunu deyir: “Əslində, 300 bal toplayacağımı heç gözləmirdim. Amma balımı öyrənəndə elə bir duyğu yaşadım ki, izahı çətindir. Gözlərim doldu, o an bütün əziyyətlərim gözümün önündən keçdi, göz yaşlarım sevincimə çevrildi. Müəllimlərimə olan sevgim, gələcəkdə sevdiyim sahədə uğur qazanmaq arzusu məni daim irəli aparan güc olub”.

IV ixtisas qrupu üzrə imtahana hazırlaşan Aişənin ən böyük arzusu Azərbaycan Tibb Universitetində təhsil almaq və gələcəkdə peşəsinə vurğun, yenilikçi bir cərrah olmaqdır: “Uşaqlıqdan dərslərimə ciddi yanaşmışam, amma mənim üçün bilikdən əlavə ruhumu oxşayan şeylər də önəmlidir. Kitab oxumaq, sevdiyim sənətçilərin musiqilərini dinləmək, məktəb tədbirlərində iştirak etmək kimi fəaliyyətlər ruhumu bəsləyən hissələr olub. Özümü həm elmə, həm də incəsənətə yaxın hiss edirəm. Şeir müsabiqələri, yarışlar mənim üçün sadəcə yarış deyil, özümü ifadə etməyin ən gözəl yoludur”.